28 декабрь куни Озодликка келиб тушган видеотасвирда бир эркак бир аёлни юз тубан ётқизиб, устига тиззасини қўйиб қийноққа солаётгани акс этган.
Бу воқеа 26 октябрь куни эрта тонгда даги "Қум ота фермер хўжалиги" даласида бўлиб ўтган. Қийноққа солинаётган аёл Феруза Убайдуллаева бўлиб, унинг айтишича, қийнаётган эркак иш берувчиси Зиёдилло Ўроқовнинг укаси Ихтиёрдир.
Уч боланинг онаси 35 яшар Феруза Убайдуллаеванинг айтишича, у оғзаки шартнома асосида йил давомида “Қум ота бува” фермер хўжалиги ерида эри билан бирга ишлаган, лекин фермер уни алдаган.
Ферузанинг айтишича, шундан сўнг фермернинг укалари уларни ўғриликда айблаб, шафқатсиз калтаклашган. Феруза ака-укалар уни таҳқирлашганини ва зўрлаш билан таҳдид қилганликларини айтади.
Янгиқўрғон МФЙ раиси Турғун Тўраевнинг айтишича, у Феруза Убайдуллаеванинг қўл-оёғини участка нозири билан воқеа жойига етиб келгач, ечган. "Мош ўғриси қўлга тушди, деди. Борсак шу Феруза экан. Оёқ-қўлини боғлаб қўйишган экан. Қарасам, аҳволи ёмон. Кейин ўзим скорий чақириб, ўзим касалхонага олиб бордим. Лекин уларнинг жанжалида ким ҳақ эканлигини билмайман. Прокуратура аралашганидан сўнг, Ферузанинг иш ҳақи менинг гувоҳлигимда фермердан унга олиб берилган", деди Турғун Тўраев.
Ака-ука Ўроқовлар Ўзбекистон Маъмурий жавобгарлик тўғрисидаги Кодекснинг 41-моддаси(ҳақорат қилиш), 52-моддаси 2-қисми(енгил тан жароҳати етказиш) билан айбли деб топилиб, энг кам ойлик иш ҳақининг икки баравари миқдорида жаримага тортилган.
Феруза Убайдуллаеванинг айтишича, суд уни "ваҳшийларча калтаклаган ва аёллик номусини таҳқирлаган" ака-укаларга нисбатан жуда ҳам енгил жазо берганидан у норози.
Бу воқеа юзасидан тергов суриштируви олиб борган Оқдарё тумани ички ишлар бўлими терговчиси Азиз Нозимовнинг айтишича, суриштирув давомида у бу видеони кўрмаган. "Агар даъвогар томонда қўшимча маълумотлар пайдо бўлган бўлса, марҳамат, яна ариза билан мурожаат қилишлари мумкин", деди Нозимов.