Басылманын маалыматына караганда, Уиган айыптоолорду четке кагууда.
Адвокат Владимир Жеребенков Уиландын камакка алынышы боюнча Москва шаардык сотуна даттанып, аны күрөөгө кое берүүнү өтүнүүдө.
ФСБ 48 жаштагы Уиланды 28-декабрда кармаган. 29-декабрда Москванын Лефортов райондук соту ага камакка алуу бөгөт чарасын белгилеген. Ал тагылган айыптар боюнча 20 жылга чейин эркинен ажыратылышы мүмкүн.
- «Росбалт» агенттиги атайын кызматтагы өз булактарына шилтеме кылуу менен Уилан Орусиянын жашыруун мекемелеринин биринде иштеген кызматкерлердин тизмеси жазылган флеш-картаны алып жатканда кармалганын билдирүүдө. Агенттиктин маектеши ал маалыматтар мамлекеттик сыр экенин айткан.
- Шаршембиде "Лефортово" тергөө абагында жаткан Уилан менен АКШнын Орусиядагы элчиси Жон Хантсман жолуккан. АКШнын мамлекеттик катчысы Майк Помпео Орусиядан америкалык жаранга тагылган айыптоолордун чоо-жайын сурап, аны тез арада бошотууну талап кылганын билдирди.
- 48 жаштагы Пол Уилан америкалык BorgWarner компаниясынын коопсуздук боюнча директору болуп иштейт. Компания автоунаа тетиктерин жеткирүү менен алектенет. 1994-жылдан 2008-жылга чейин АКШнын деңиз аскер корпусунун резервдеги кызматкери катары кызмат өтөгөн. Армиядан уурулук айыбына байланыштуу кетирилген.
- Уиландын туугандары анын Чалгын кызматы менен байланышы бар экенин четке кагышууда. Алардын айтымдарында, ал Москвага досунун үйлөнүү тоюна катышуу үчүн барган.