“Азаттыктын” түркмөн кызматынын кабарчысы билдиргендей, Дашогуз облусунун мактептеринин дубалдарына президенттин чачын ак аралаган сүрөттөрү илинген. Бул үчүн мугалимдер 5 манаттан чогултушкан.
Мындан тышкары өлкөнүн бардык мамлекеттик мекеме-ишканаларында президенттин портреттери жаңыланууда.
Учурда Ашхабадда президенттин чачын ак аралаган сүрөттөрүн ээн-эркин 5 манаттан ($1,3) сатып алса болот. Түркмөн президентинин “өткөн сезондогу” кара чачтуу сүрөттөрү болсо арзандатуулар менен 4 манаттан ($1) сатылууда.
Былтыр жайында Түркмөнстан президенти Гурбангулы Бердымухамедов күтүүсүздөн имиджин өзгөртүп, эл алдына ак аралаш чачы менен чыга баштаган.
Түркмөнстанда президенттин портреттери маал-маалы менен жаңыланып турат. Сүрөттөр мамлекеттик мекемелерде, коомдук жайларда, мектептерде, ооруканаларда илинүүгө тийиш.