Жараëн тафсилотларидан хабардор тошкентлик мутахассиснинг шахси сир қолиш шарти билан айтишича¸ Амстердамда самолётнинг мотори алмаштирилади.
Аввалроқ, "$200 миллионлик Dreamliner икки йилга қолмай ишдан чиқди" сарлавҳали мақоладан икки кун ўтиб раддия берган Uzbekistan airways раҳбарияти учқичнинг "режали модификация қилиш (Upgrade) учун жўнатил"ганини иддао қилган эди.
7 январь куни Uzbekistan airways ширкати учқичлари аҳволидан бевосита хабардор мутахассис¸ бир марталик учишга рухсат берилган Dreamlinerнинг ҳозирда Ҳолландия пойтахтида эканини билдирди. “Двигателга қиринди тушиб¸ турбина кураклари қайрилганидан кейин¸ Тошкентда режадан ташқари ремонт қилишди. Двигатель ишлаб чиқарувчиси “Ҳаво йўллари”га моторни бутунлай алмаштириш учун бир марта учишга рухсат берди. Dreamlinerни нега Амстердамга олиб келишгани сабаби¸ билишимча¸ зиëн етган моторни кўриб чиқишгунча арендага олиб туриш мумкин моторни шу ердан топишган”.
UK-78702 Dreamlinerнинг Амстердамга учиб келганини flightradar24.com мустақил сайти тасдиқлайди.
Uzbekistan Airways акцияларининг 100 фоизи ҳозирча давлатга қарашли ва миллий авиакомпания сарфлайдиган ҳар бир тийин ўзбекистонлик солиқ тўловчининг пулидир.
Шу боис¸ мутахассислар¸ ширкатнинг бу жараëн солиқ тўловчига қанчага тушиши ҳақида шаффоф маълумот бермаëтганини танқид қилди.
Айни пайтда миллий авиакомпания регистрация рақами UK-78702 бўлган Dreamliner учқичининг айнан аввалдан режалаштирилган модификация - upgrade учун парвозлардан олинганини тасдиқловчи факт ва ҳужжатларни маҳаллий матбуотга тақдим қилгани йўқ.
Шунингдек ширкат ҳозирча 24 декабрдан бери учмаëтган Dreamliner учқичининг яна қанча "upgrade" жараëнида қолиши ҳақида ҳам аниқ маълумот берганича йўқ.