Собиқ МХХ (жорий номи ДХХ - Давлат хавфсизлик хизмати) полковниги Тўрақуловнинг 16 йилга қамалгани ҳақида Ўзбекистон Республикаси Олий суд Ҳарбий ҳайъати ҳукми билан танишган, суд жараёнида жабрланувчи сифатида қатнашган манба маълум қилди.
Тўрақулов иши бўйича жабрланувчи сифатида маҳкамада иштирок этган сурхондарёлик бу йигитнинг айтишича, суд Нодир Тўрақуловни 16 йилга озодликдан маҳрум қилиш тўғрисида ҳукм чиқарган.
Нодир Тўрақулов иши бўйича ўтган маҳкама тафсилотларидан яхши хабардор ҳуқуқшунос ҳам собиқ полковникка нисбатан суд ҳукми чиққанини тасдиқлади.
“Тўрақулов иши бўйича биринчи эпизод якунланиб, суд ҳукми чиқди. Ҳозирда иккинчи эпизод бўйича тергов кетаяпти”, деди исмини очиқламаётганимиз ҳуқуқшунос.
Нодир Тўрақулов иши бўйича гувоҳлар ва жабрланувчилар билан суҳбатлашган "Эзгулик" жамияти раҳбари Абдураҳмон Ташанов ҳам собиқ полковник судига оид тафсилотлардан хабардорлигини айтади.
- Полковник Тўрақулов Нодир Дилмуродовичга нисбатан Олий суд ҳарбий ҳайъатининг 2018 йил 25 октябрда ҳукми чиққан. Суд ҳукмига кўра, Нодир Тўрақулов Жиноят кодексининг мансаб доирасидан чиқиш, мансаб ваколатини суиистеъмол қилиш, пора олиш, фирибгарлик, товламачилик сингари 10 дан ортиқ моддалари билан айбдор деб топилиб, 16 йил муддатга озодликдан маҳрум қилиш жазоси белгиланган. Бундан ташқари у энг кам иш ҳақининг 400 баробари миқдорида жаримага тортилган,- дейди Абдураҳмон Ташанов.
Олий суд Ҳарбий ҳайъатида 42 яшар Нодир Тўрақулов билан биргаликда МХХ мулозимлари, прокурор, милиция ва тадбиркорлардан иборат, жами 12 нафар киши судланаётган эди.
Абдураҳмон Ташановга кўра, Тўрақуловга нисбатан очилган иккинчи жиноий иш доирасида у яна 10га яқин модда бўйича айбланмоқда.
Собиқ МХХ терговчиси Нодир Тўрақулов Ўзбекистон президентининг 19 январь куни Қизириқдаги йиғилишда МХХнинг айни вилоятдаги бошқармаси фаолиятини кескин танқид қилгани ортидан Тошкентда қамоққа олинган эди.
Тўрақулов қамоққа олинганидан кейин у ишлаган МХХ идораси раҳбари Давлат хавфсизлик хизмати деб ўзгартирилди¸ уни 23 йил давомида бошқариб келган қудратли генерал Рустам Иноятов ўрнига¸ ўтган йилнинг 30 январь куни мамлакат Бош прокурори бўлиб ишлаган Ихтиëр Абдуллаев тайинланди.
Президент буйруғи билан қамоққа олинган Нодир Тўрақулов Ўзбекистон собиқ Бош прокурори Рашиджон Қодировнинг акасининг қизига уйланган¸ тўрт фарзанди бор.