Ссылки доступа

Форишда бир ҳафтада бир коллежнинг икки ўқувчиси осилган ҳолда топилди


Жиззах вилоят, Фориш туманидаги Маиший хизмат кўрсатиш касб-ҳунар коллежининг 3-босқич ўғил бола ўқувчиси 6 январь куни осилган ҳолда топилди. Бу ҳақда хабар берган коллеж ўқитувчисининг айтишича, 28 декабрь куни 3-босқичда ўқийдиган яна бир ўқувчи - қиз бола осилган ҳолда топилган.

Фориш маиший хизмат кўрсатиш касб-ҳунар коллежининг 3-босқич ўқувчиси 18 яшар Ш.У. 6 январь куни кечқурун уйининг молхонасида "ўзини осиб ўлдиргани" ҳақида шу коллежнинг исми сир қолишини сўраган ўқитувчиларидан бири хабар берди.

“Ўша куни Ш. ўртоқларини уйига чақириб, ташқарида ўчоқда овқат қилишган. Овқат пишганидан сўнг ўртоқларига, сизлар овқатни сузиб туринглар, мен ҳожатга чиқиб келай деганда, молхона томонга ўтиб кетган. У ҳеч келавермагач, ўртоқларидан бири орқасидан борса, молхона тўсинига ўзини осиб қўйган экан”, - деди суҳбатдош.

Ўқитувчининг айтишича, Янги йилдан уч кун олдин коллежнинг яна бир ўқувчи қизи ўз жонига қасд қилган эди. “Бирданига балки бу ёшлар ўртасида қандайдир муносабат бўлган бўлса керак, деган хаёл келди. Марҳумларнинг ўртоқлари ва дугоналари билан гаплашганимиздан кейин улар орасида ҳеч қандай муносабат бўлмаганини, бир-бирига боғлиқ бўлмаган ҳодиса эканлиги аниқланди”, деди ўқитувчи.

Фориш тумани ички ишлар бўлимининг ўзини таништирмаган мулозими коллеж икки ўқувчисининг ўлганини тасдиқлади ва бу ҳолатлар билан туман прокуратураси шуғулланаётганини айтди.

Суҳбатдошларга кўра, ҳар иккала ўзини ўсган ўқувчи болалар ўзига тўқ, ижтимоий қийинчилиги йўқ оилалардан бўлган.

Ўзбекистон ҳукумати ўсмирлар орасида ўз жонига қасд қилиш ҳоллари ортиб бораётганидан ташвиш билдириб келмоқда. Жорий йилнинг 1 апрелдан бошлаб ички ишлар органлари ўз жонига қасд қилишга уриниш бўйича ҳар бир ҳолат ҳақида зудлик билан руҳий шифохоналарга хабар беришлари шарт.

XS
SM
MD
LG