24-ёшли Нурали Қиясовга нисбатан “аввалдан келишиб олган ҳолда бир гуруҳ шахслар билан қурол ишлатиш орқали ўғирлик содир этиш” ва “аввалдан тил бириктирган ҳолда бир гуруҳ шахслар иштирокида ёллаш, ёки ёлланиш орқали ёки таъмагирлик орқали қасддан қотиллик қилиш” айблари қўйилмоқда.
Ўғирлик ва қотиллик айби 24-ёшли Арман Қудайбергеновга ҳам қўйилди. Судланувчи 23-ёшли Жанар Толибаева жиноят ҳақида маълумот бермаганликда айбланмоқда. Уларнинг иккови 11 январ, жума куни баёнот бериб ўзларига қўйилаётган айбловлардан норози эканликларини айтишди ва суддан қўйилаётган модда бошқасига алмаштирилишини сўрашди.
Бу иш бўйича “муҳим жараён” Жиноий ишлар бўйича Олмаота шаҳар ихтисослаштирилган туманлараро судида 3 январ куни бошланди.
2014 йилги Сочида бўлиб ўтган Олимпиада ўйинларининг бронза медали соҳиби Денис Тен ўтган йилнинг19 июл куни Олмаотадаги шифохонада вафот этди. У мазкур шифохонага ўша куни пичоқдан олган жароҳатлари туфайли олиб келинган эди. Полиция версиясига кўра, Тен ҳодиса жойида қўлга олинган автомобил ўғриларининг қурбонига айланган. Денис Теннинг сонига пичоқ санчилган; кейинроқ тиббиётчилар спортсмен кўп қон йўқотганини айтишди, у ҳушсиз ҳолда шифохонага олиб келингани боис ҳаётини сақлаб қолишнинг иложи бўлмади.