Самолёт Бишкекка Таиланддан ярим соатлик кечикиш билан 13 январ куни кечқурун келган. Шундан сўнг, чегарачиларнинг маълумотига кўра, 16 нафар экипаж аъзоларидан 11 нафари шаҳарга чиққан. Самолёт Бишкекдан эрталабки 7.16 учиб кетган ва Теҳрон яқинидаги "Пайам" аэропортига қўниши керак эди.
Ҳалокат Теҳрон яқинида тахминан эрталабки 11 ларда юз берди. Reutersнинг маълум қилишича, ҳалокат юз берган минтақада ноқулай об-ҳаво кузатилган эди. Boeing капитани "Пайам" аэропорти ўрнига Фат аэродромига фавқулотда қўнишга ҳаракат қилди, бироқ бошқарувни йўқотди. Самолёт қўниш майдончасидан ташқарига –турар жой туманига чиқиб, ёниб кетди.
Унинг бортида бўлган 16 нафар экипаж аъзоси ва йўловчилардан 15 нафари, жумладан бир аёл ҳалок бўлди, уларнинг ҳаммаси Эрон фуқароларидир. Тирик қолган ягона киши – бортинженер шифохонага олиб борилди.
Қирғизистон расмийларининг маълумотига кўра, Эрон армияси эҳтиёжлари учун гўшт етказиб бериш билан маҳаллий "Наведитс" компанияси шуғулланиб келади. Бу йил ҳисоби бўйича илк бор 30 тонна қўй гўшти етказиб берилиши керак эди.
"2017 йилда 146 тонна гўшт етказиб берилган эди, 2018-йилда786 тонна етказилди, - дейди Қирғизистон Давлат ветинспекция ходими Сезимбек Шийшекеев. – Бу шу йилги биринчи юк эди. Фақат мана шу фирма Қирғизистондан Эронга юк экспорт қилиш билан шуғулланади".
"Боинг-707" эксплуатацияга 40 йил муқадам киритилган эди. Самолётларнинг бу русуми 1958 йилдан 1979 йилгача ишлаб чиқарилган. Умумий ҳисобда фалокат ва жиддий авариялар туфайли шу моделдаги 172 самолёт ҳалокатга учраган.