Ссылки доступа

Риштонлик кулолларнинг 200 дан ортиқ цехи газ йўқлиги ëки қимматлигидан ишламай турибди


Фарғона вилоят, Риштон туманидаги 225 та кулолчилик цехидан тақрибан 10 тасигина ишламоқда. Кулолларнинг айтишича, ишнинг тўхтаб қолганига газнинг йўқлиги ва қимматлиги сабабдир. Риштон туманидаги “Ҳунарманд” уюшмаси раҳбари вазиятни мавсумий кўриниш сифатида баҳолади.

Сопол ва чинни идишлари билан танилган Риштонда 225 та кулолчилик цехи мавжуд. Ҳар бир цехнинг идиш пишириладиган ўртача 2 тадан, жами 450 та хумдони бор. Ҳар бир цехда 5 дан 10 нафаргача ишчи ишлайди. Аниқроғи, ишлар эди. Чунки шу кунда 10 танинг атрофидагина цех ишлаб турибди.

Бу маълумотларни Риштондаги “Ҳунарманд” уюшмасида тасдиқлашди.

Куни кеча риштонлик блогер Дима Қаюм Фейсбукдаги саҳифасида кулолларнинг илтимоси билан уларнинг муаммолари тўғрисида видеопост эълон қилди.

Видеопостига илова қилган матнида Дима Қаюм, жумладан, бундай деган:

“Риштон саноат зонаси тахминан 10 йиллар аввал қурилган. 33 гектарли ерда маҳаллий тадбиркор кулоллар ўз маҳсулотлотларини ишлаб чиқаради.

Биласизлар, Риштон кулолчилиги бутун дунёга машҳур!
Маҳсулотлар бутун дунёга экспорт бўлади. Миллий кулолчилигимизни давом эттираётган кулолларнинг муаммоси, доимгидай, - газ!

Мана неча йилдирки, қиш фасли бошланмай, аҳолига бериш важи билан цехлар газдан узилади. 200 дан ошиқ тадбиркор ва шу тадбиркор қўлида ишлаётган 5000 дан ошиқ риштонликлар то апрель-май ойигача газ берилмагани сабабли ишсиз қолади”.

Риштон туман ҳокимлигининг ўзини Баҳодир Қамбаров деб таништирган мулозими вилоятга яқинда газ берилганини, бироқ ёнилғи, асосан, аҳолига берилаётганини айтди.

Ўзини “риштонлик кулоллардан бири Бунёд Ҳайдаров”, деб таништирган йигит газ таъминоти яхши эмаслиги ва қимматлиги учун цехини ташлаб Россияда ишлаётганини айтди: “Цехим бор. Ҳозир ҳам турибди. Хумдонларни бузиб, вагон қилганман. Вагонга ҳам кўпроқ идиш сиғади, ҳам газ тежалади. Бу йил ҳам, ўтган йили ҳам ишлаганимиз йўқ. Чунки қопламаяпти. Ишчиларга ҳақ тўлаяпмиз, газга тўлаяпмиз, шу билан ўзимизга ҳеч нарса қолмаяпти”.

Куни кеча Ўзбекистон Тожикистон аҳолисига ҳам газ етказиб беришни бошлади.

XS
SM
MD
LG