Ссылки доступа

Остона: аз 300 қазоқистонӣ дар Сурия 100 тан ҷангҷӯ ҳастанд


Дар минтақаҳои ҷангии Сурия бештар аз 300 қазоқистонӣ ҳузур доранд, ки наздики 100 танашон ҷангҷӯ ҳастанд.

Дар ин бора Нургалӣ Билисбеков, раиси Кумитаи амнияти миллии Қазоқистон имрӯз дар як ҷаласаи порлумонии он кишвар хабар дод.

Ба гуфтаи вай, миёни қазоқистониҳои мазкур занҳо ҳам ҳастанд.

"Занҳо асосан аз паси шавҳарҳояшон ба он ҷо мераванд. Аммо занҳое ҳам ҳастанд, ки дар Қазоқистон парвандаи ҷиноӣ доштанд. Дар сурати ба ватан баргаштанашон мо онҳоро ба ҷавобгарӣ ҷалб мекунем", - гуфт муовини раис.

Ба иттилои вай, "бо назардошти вазъ дар минтақаҳои ҷангии Сурия, Ироқ, Афғонистон ва минтақа" барои Қазоқистон хатарҳои мушаххасе мавҷуд аст.

"Мутаассифона, мо дар меҳвари манфиатҳои созмонҳои байналхалқии террористӣ қарор дорем. Дар ин бора боздошти гуруҳе шаҳодат медиҳад, ки ибтидои моҳи январ дар Алмато ифшо шуд. Ба онҳо амалан аз хориҷ дастур медоданд, ки дар ҳудуди Қазоқистон чи амалҳоеро анҷом диҳанд. Ҳадафашон фаҳмо - барҳам задани оромӣ ва ташкили бетартибӣ", - гуфт Билисбеков.

Пештар аз ин мақомоти Қазоқистон дар бораи аз Сурия берун овардани 47 қазоқистонӣ хабар дода буданд.

XS
SM
MD
LG