"Тәжік-ауған шекарасында ИМ-нің содырлары анықталмады. Шекарада жеткілікті әскер күші бар. Қосымша әскер мен техника әкелудің қажеттілігі жоқ", – деді Тәжікстан ұлттық қауіпсіздік комитеті шекара әскерінің баспасөз хатшысы Мухаммад Улушходжаев.
Ауған дереккөзі де елдің солтүстігіне содырлар жайғасып жатыр деген ақпаратты теріске шығарады.
Осыған дейін Ресейдің ішкі істер министрінің орынбасары Игорь Зубов "ИМ содырларын белгісіз тікұшақтармен Пәкістаннан Тәжікстан шекарасына жеткізіп жатыр. Ондағы босқындарды басып, Ресейге қарай ығыстыру мақсатында жаппай арандату әрекеттері жүруі мүмкін" деп мәлімдеген.
"Құндызда Тәжікстанмен шекарада Ауғанстан үкіметінің қарсыластары тұр деген алып-қашпа әңгіме тарады. Сонымен бірге олардың арасында Тәжікстан үкіметіне қарсы топтың барын да айтқан. Бірақ Тахар елді-мекенінде олар әлі бар. Алайда тікұшақпен содырларды тасыды деген әңгімені естімедік. Ауғанстанның солтүстігінде ИМ-нің белсенділері ешқашан байқалған емес. Онда тек тәлібтер бар", - деді Азаттықтың Ауған қызметінің тілшісі Аджмал Ариан.