Ссылки доступа

Тожик миллий гимни муаллифининг “Толибон” сафларига кириб қолган жияни ҳукм қилинди


Душанбе шаҳар суди Тожикистон халқ шоири, миллий гимн муаллифи Гулназар Келдининг жияни Иқбол Келдиевни 14 йил озодликдан маҳрум қилиш тўғрисида ҳукм чиқарди.

Пойтахтда истиқомат қилувчи 28 ёшли Иқбол Келдиевга нисбатан ҳукм январь ойида чиқарилди, у суд томонидан фаолияти тақиқланган «Ансоруллоҳ» экстремистик гуруҳига аъзоликда ва Афғонистондаги ҳарбий ҳаракатларда Толибон томонида туриб жанг қилганликда айбдор деб топилди. Суд жараёни МХДҚнинг СИЗОсида қариндошларининг иштирокисиз ёпиқ эшиклар ортида бўлиб ўтди.

Иқбол Келдиев 2018 йил охирларида афғон қамоқхонасидан Тожикистонга экстрадиция қилинган эди. У 2015 йилда бир нечта толиблар билан бига Афғонистоннинг Қундуз вилоятида қўлга олинган эди, унинг ёнидан Афғонистоннинг сохта паспорти топилганди. 2016 йилда Афғонистон суди Келдиевни ҳужжатларни сохталаштириш ва ҳукуматга қарши кучлар томонида туриб жанг қилганликда айбдор деб топиб, 16 йил қамоқ жазосига ҳукм қилган эди.

Келдиев Душанбега экстрадиция қилинганидан сўнг, мамлакат Жиноят кодексига кўра, қайтадан суд жараёни бўлиб ўтди ва суд томонидан у террор гуруҳларига аъзоликда айбдор деб топилди. Ҳукм қонуний кучга кирди ва Келдиев колониялардан бирида жазони ўтамоқда.

Душанбе шаҳар судидаги манбанинг 6 феврал куни маълум қилишича, Иқбол Келдиев Тожикистон Жиноят Кодексининг бир нечта моддалари – жиноий гурух ташкил қилиш, терроризм, фуқароларни экстремистик ташкилотлар сафига ёллаш бўйича айбдор деб топилган. Унинг сўзларига қараганда, Келдиев судда айбловларнинг катта қисми бўйича ўз айбига иқрор бўлди ва «алданиб қолгани» борасида баёнот берди.

Манбанинг айтишича, Иқбол Келдиев Толибон билан яхши муносабатда бўлган: 2014 йилда толиблар чегарада тўрт нафар тожик аскарини гаровга олди, ҳамда бу аскарлар Келдиев озод қилиниши эвазига қўйиб юборилишини айтишган эди.

Ёш йигитнинг амакиси, Тожикистон халқ шоири Гулназар Келди 6 феврал куни ҳақиқатан ҳам жияни узоқ муддатга озодликдан маҳрум қилинганини тасдиқлади. «Иқбол – менинг жияним. У пул топиш мақсадида Россияга кетган эди, ўша ерда экстремистик гуруҳларнинг эмиссарлари таъсирига тушиб қолган. Покистонга борган, у ерда жароҳат олган, сўнг Афғонистонга ўтган. У айбига иқрор бўлди ва пушаймон эканини айтди», - деди Гулназар Келди. Унинг сўзларига қараганда, қариндошлар амнистияга умид қилмоқда.

XS
SM
MD
LG