Ссылки доступа

Туркманистон иҷрои нақшаи пахтаву гандумро ду-се баробар зиёд эълом кардааст


Туркманистон нақшаи давлатии пахтаву гандумро дар соли 2018 натавонист иҷро кунад ва дар оморҳои расмӣ ҳаҷми ҳосили ҷамъшудаи пахтаро ду баробар ва аз гандумро се баробар бештар нишон додааст.

Дар ин бора "Хроника Туркменистана" бо истинод ба арқоме хабар дод, ки дар гузоришҳои Вазорати кишоварзӣ ва оби Туркманистон дарҷ шудаанд.

Бино ба иттилои расмӣ, кишоварзони Туркманистон соли гузашта 450 ҳазор тонна пахта ҷамъоварӣ кардаанд. Вале ҳукумати Туркманистон 17 декабри соли 2018 ҳаҷми пахтаи ҷамъшударо беш аз 1 миллиону 99 ҳазору 236 тонна эълом кард. Бино бар нақшаи раҳбарияти ин кишвар, бояд 1 миллиону 50 ҳазор тонна пахта ҷамъоварӣ мешуд.

"Хроника Туркменистана" менависад, ки соли 2018 нақшаи давлатии гандум дар Туркманистон танҳо 30% иҷро шудааст. Кишоварзон ба ҷои 1,6 миллион тонна гандуми нақшавӣ 538 ҳазор тонна ҷамъоварӣ карданд.

Туркманистон дар пасманзари хабарҳои ҷалби иҷбории кормандони давлатӣ ба пахтачинӣ, таъхири пардохти пули кишоварзон, камҳосилӣ ва худдории деҳқонон аз кишти пахта ба иллати камсудияш аз аввали соли равон нархи хариди давлатии пахта ва гандумро боло бурд.

Дар ин кишвар замин моликияти давлат буда, кишоварзоне, ки онро ба иҷора мегиранд, бо дастури мақомот маҷбуранд танҳо пахта ва гандум кишт кунанд.

XS
SM
MD
LG