Бу ташкилот қозоқ репатриантлари (ватанига қайтганлар)ни ҳуқуқий қўллаб-қувватлаш ва хайрия ёрдамлари билан шуғулланиб келган.
Олмаотадаги Медеу туман полициясидан судга келиб тушган материалларга қараганда, Хитойдан тарихий ватанига келган этник қозоқ Серикжан Билашга нисбатан “Қозоғистон Республикасининг жамоат, диний бирлашмалар, уларнинг фаолиятини молиялаштириш тўғрисидаги қонунида белгиланган тартибда рўйхатга олинмаган фолиятда иштирок этиш ва раҳбарлик қилиш” (Маъмурий ҳуқуқ бузилишлар тўғрисидаги Кодекснинг 489 моддаси) бўйича айблов қўйилган.
Суд мажлисида Серикжан Билаш ўзига қўйилган айбловга қарши эканини билдирди. Унинг айтишича, «Атажұрт еріктілері» - бу Шинжондаги этник қозоқларга нисбатан босимлардан хавотирга тушаётган волонтерлар томонидан ижтимоий тармоқда ташкил этилган гуруҳдир. Билашнинг сўзларига қараганда, бу гуруҳга ҳар бир кўнгилли қўшилиши ва хоҳлаган вақтда уни тарк этиши мумкин. Гуруҳ иштирокчиларига аъзоликни белгиловчи бирор бир ҳужжат берилмайди. Шу сабабли, ўзини гуруҳ “админи” дея атовчи Билашнинг айтишича, «Атажұрт еріктілері»ни бирлашма деб атаб бўлмайди.
Судьянинг “Гуруҳнинг идораси ва доимий манзили борми?” дея берган саволига, Серикжан Билаш идора борлигини айтди. Билашнинг таъкидлашича, бу идора гуруҳ таркибида бўлган тадбиркор томонидан ижарага олинган.
Судда Серикжан Билаш, «Атажұрт еріктілері» репатриантларни, қариндошлари Шинжондаги қамоқхоналарда (“қайта тарбиялаш лагерлари”да)қолган ёки Пекин томонидан тўсиқ қўйилгани туфайли Хитойдан Қозоғистонга кела олмаётган этник қозоқларнинг бўлинган оилалари вакилларини қўллаб-қувватлашини маълум қилди. Судья суд «Атажұрт еріктілері» фаолиятига баҳо бериш ниятида эмаслигини, фақат ишни ойдинлаштирмоқчи эканлигини айтди. Шу сабабли суд мажлисига 13 феврал куни Медеу туман полициясининг вакили чақирилди.
Сешанба кунги суд эшитувларига Билаш тарафдорлари келди. Суд зали мажлисга қатнашмоқчими бўлганларнинг ҳаммасини сиғдира олмади, кўпчилик кўчада қолди.
Серикжан Билаш қариндошлари мажбурий ҳибсда ушлаб турилган қозоқлар иштирокида бир неча бор Олмаотада матбуот анжумани ўтказди. У Қозоғистонга қочиб келган чегарани ноқонуний кесиб ўтганликда айбланган хитойлик қозоқ аёли Сайрагул Сауитбай иши бўйича суд мажлисида иштирок этди.