Ихтиёр Абдуллаевга нисбатан эҳтиёт чорасини қўллаш тўғрисидаги қарорни қайси суд қачон чиқарганини мулозим очиқламади.
ДХХнинг жорий раҳбарияти таркибида ишлаётган ва собиқ раиснинг қўл остида ишлаган манбаларга кўра, Ихтиëр Абдуллаев ДХХ ертўласида жойлашган тергов изоляторида сақланмоқда.
ДХХ раиси сифатида бир йил ишлаган Ихтиёр Абдуллаев 8 февраль куни саломатлиги боис эгаллаб турган лавозимидан озод қилингани хабар қилинган.
ДХХ собиқ раҳбари қўлида ишлаган зобит иддаосига кўра¸ Ихтиëр Абдуллаевга қарши унинг божаси, шу кунда ИИБ тергов изоляторида сақланиб, тергов қилинаëтган ДХХ раисининг собиқ маслаҳатчиси Алишер Эшонхўжаев кўрсатма бермоқда.
ДХХнинг жорий раҳбариятига яқин мулозимнинг \айтишича, Алишер Эшонхўжаев 11 февраль куни қамоққа олинган.
Мулозимнинг иддаосига кўра¸ ДХХ собиқ раиси ва унинг божасининг ушланишига жорий йилнинг 11 январида ҳибсга олинган ДХХ раисининг 46 ёшли собиқ биринчи ўринбосари Жаҳонгир Эгамовнинг кўрсатмалари асос бўлган.
ДХХ собиқ раҳбари қўлида ишлаган зобитнинг иддаосига кўра¸ Ихтиëр Абдуллаев сўнгги 6 ой ичида мунтазам кузатувда бўлган ва бу кузатувнинг бир қисмини унинг ҳайдовчиси амалга оширган.
Айни пайтда Ўзбекистон президентининг Интернетдаги расмий саҳифасида Ихтиёр Абдуллаев соғлиги ёмонлашгани, бир йилдан буён бўйин ва умуртқа поғонасида икки марта оғир жарроҳлик амалиётини ўтказгани ортидан лавозимидан озод қилингани ҳақидаги билдирув турибди.
Мулозимга кўра¸ “ДХХ раиси сифатида бир йил ишлаган Ихтиёр Абдуллаев унинг кўплаб қариндошлари ва айни ташкилотнинг ўнлаб ходимлари устидан жиноят иши очилиб қамоққа олингани ортидан ишдан бўшатилган”.
Мулозимнинг яна айтишича¸ Ихтиёр Абдуллаев ҳозирча "иқтисодий жиноятларни содир қилганликда" гумонланмоқда.
Бир-биридан мустақил икки нафар мулозимнинг билдиришича¸ Ихтиёр Абдуллаевга нисбатан Ўзбекистон Жиноят кодексининг 205-моддаси (“Ҳокимият ёки мансаб ваколатини суиистеъмол қилиш”), 210-модда (“Пора олиш”) ва 211-модда (“Пора бериш”) бўйича жорий йилнинг 8 февралида жиноят иши очилган.
Суҳбатдошлар иддаосига кўра¸ "жиноят иши республика ҳарбий прокуратураси тарафидан очилган".
Мулозимларнинг расман тасдиқланмаган иддаосига кўра, ДХХ тарафидан Мирзиëев оила аъзоларининг телефон сўзлашмалари тинглангани ва назорат остига олингани боис Ихтиёр Абдуллаев президент учун “исталмаган шахсга” айланган.
Амалдорга кўра¸ қамоққа олинган ДХХ ходимлари Ўзбекистон Жиноят кодексининг 167-моддаси (“Ўзлаштириш ёки растрата йўли билан талон-тарож қилиш”), 205-моддаси (“Ҳокимият ёки мансаб ваколатини суиистеъмол қилиш”), 210-модда (“Пора олиш”) ва 211-модда (“Пора бериш”) кўзда тутган жиноятларда гумон қилинмоқда.