Қозоғистон информация ва коммуникациялар вазири Даурен Абаев Остонада мухбирларга, агар митинг ўтказиладиган бўлса, унда иштирок этиб ўз мавқеи юзасидан тушунтириш беришга тайёрлигини билдирди.
Қозоғистон ахборот ва коммуникациялар вазири Даурен Абаев 19 феврал куни Остонада журналистларга берган интервьюсида журналистларнинг аккредитацияси тўғрисидаги қоидаларга ўзгартиш киритилишини сўраб Қозоғистондаги ОАВ бош муҳаррирлари илтимос қилганлигини айтди. Шу билан бирга у вазирликка илтимос билан мурожаат қилган бош муҳаррирларнинг исми шарифини айтмади. Абаевнинг сўзларига қараганда уларнинг мурожаатидан сўнг, журналистлар орасида норозиликларга сабаб бўлган, қоидалар ишлаб чиқилган.
Вазирнинг айтишича, бош муҳаррирлар таҳририятда ишламаётган журналистлар ҳамон аввал олган аккредитациядан фойдаланиб келаётгани билан боғлиқ муаммо билан тўқнаш келган, ва шу сабабли қоидаларга янги меъёр киритилишини сўрашган. Янги меъёрга кўра, журналист аккредитация тўғрисидаги аризасига ОАВ муҳарририяти билан муносабатларига оид шартномани тасдиқловчи ҳужжат нусхасини илова қилиши керак.
Ҳукумат буйруғига киритиладиган ўзгартишлар танқид қилинганидан кейин Даурен Абаев «модератор регламенти» бузилиши туфайли аккредитациядан маҳрум қилиш борасидаги пункт олиб ташланишини маълум қилди.
«Ҳозир журналистлар давлат идоралари доирасида ўтказиладиган битта тадбирга бориб, бир нечта хоналарга кириб чиқаётгани юзасидан шикоятлар тушмоқда. Ички регламент бор экан, бу каби ҳолатларга йўл қўйиб бўлмайди. Иш этикаси мавжуд, биз унга итоат этишимиз керак. Масалан сиз, йўлакда амалдорни кўриб қолдингиз, ҳар қандай саволни сўрашингиз мумкин, аммо унинг хонасига кириб бўлмайди – бу нотўғри ва бунга йўл қўйиш керак эмас», -дейди Абаев.
Абаевнинг баёнотига кўра, журналистларнинг аккредитацияси қоидалари тўғрисидаги ўзгартишлар лойиҳаси муҳокама қилиниш учун эълон қилинди. «Ҳозир бизда ҳиссиётлар бор, мен тушунаман … Исботланг ва бизга жавоб беринг. Мен мутлоқ ишонаманки, хафа бўлманг, бу ерда турганларнинг ярми ҳам бу қоидаларни ўқиб кўрмаган», -дея вазир мухбирларга мурожаат қилди.
Вазирнинг аккредитация қоидалари тўғрисидаги буйруғига айрим ўзгартишлар киритиш истиқболлари Қозоғистон журналистларини ташвишга солди. Норматив-ҳуқуқий актлар порталида эълон қилинган лойиҳа остида қолдирилган шарҳларда улар таклиф қилинаётган ўзгартиришлар қонунчиликка зид эканини ва ахборот олиш ҳуқуқини бузишини таъкидлашди.