Калтакланган ИИБ зобитининг айтишича, "бўйсунмаслик ҳолати" бўлган.
Чилонзор туман Ички ишлар бўлимининг суҳбатлашган ходими милиция катта лейтенантига қўл кўтарган тўрт шахс қўлга олиниб, суриштирув олиб борилаётганини айтди.
ИИБ ходимини калтаклагани айтилаётганларнинг ўзлари ёки уларнинг вакиллари билан боғланишнинг имкони бўлмади.
Воқеа гувоҳи бўлган пойтахтликлардан бири катта лейтенант унвонидаги участка нозири И.М. домдаги хонадонлардан бирида яшовчи йигитлардан ҳужжатларини сўраганида, улар милиция ходимининг қонуний талабларига бўйсунмай, қаршилик кўрсатишгани ва нозирнинг боши ҳамда юзига уриб, жароҳат етказишганини айтди.
- Домимизнинг еттинчи қаватида савдогар йигитлар яшайди. Участкавойимиз паспортларини сўраган, пропискаси йўқ бўлганми, қаршилик қилишган. Ғала-ғовур овозини эшитиб чиқсак, ҳалиги йигитлар участковойни ерга босиб, бошига ва юзига тепишяпти. Кейин участковойнинг ёрдамчиси етиб келди. Йигитларни милиция бўлимига, участковойни эса, қонга беланган ҳолда касалхонага олиб кетишди, - деди исми очиқланмаслигини сўраган чилонзорликлардан бири.
Милиция зобити бўйсунмаслик ҳолати бўлгани, лекин бу бўйича даъвоси йўқлигини айтди.
- Озгина маъмурий иш бўйича неподчинение бўлиб қолди. Келинг, менда претензия йўқ. Мен ҳозир больничнийдаман, ҳеч нарса айтолмайман сизга, - деб гапни қисқа қилди катта лейтенант И.М.
Гувоҳларнинг айтишича, милиция зобитига тўрт йигит ташланган.
Жанжал рўй берган турар-жойнинг домкоми милиция зобити билан жанжаллашганлар қашқадарёлик савдогарлар эканини айтди.
- Бу йигитлар Абу Саҳийда савдо қилишади. Қашқадарёдан келишган. Квартирани кирага олиб туришади. Пропискаси бор-йўқлигини билмайман, лекин ёмон йигитлар эмас. Жанжал нимадан бўлган, билмайман, уни Чилонзор милициясидан сўрайсиз, - деди маҳалла фаоли.
Чилонзор тумани Ички ишлар бўлимининг суҳбатлашган ходими милиция катта лейтенантига қўл кўтарган тўрт шахс қўлга олиниб, суриштирув олиб борилаётганини айтди.