Ссылки доступа

Роҳпаймоии гиромидошти хотираи Немтсов дар даҳҳо шаҳри Русия (видео)


Дар Москва, Санкт-Петербург, Воронеж, Ярослав ва як қатор шаҳрҳои дигари Русия 24 феврал ҳазорҳо нафар ба кӯчаҳо баромада, хотираи Борис Немтсов, мухолифи кушташудаи русро гиромӣ доштанд.

Сокинони Москва дар "Булварное колтсо" роҳпаймоӣ карда, бино ба иттилои созмони "Ҳисоби сафед", дар он беш аз 10 ҳазор одам иштирок карданд. Пулис гуфт, дар ин роҳпаймои Москва шаш ҳазор ширкат кардааст.

Роҳпаймоиро ҳаракати "Ҳамраъйӣ", ҳизбҳои ПАРНАС ва "Яблоко", Бунёди мубориза бо коррупсия ва созмонҳои дигари мухолифи Русия ташкил карданд. Дар он сиёсатмадорон Михаил Касянов, Владимир Рижков, Алексей Навалний, Иля Яшин, Дмитрий Гудков ва Владимир Кара-Мурза иштирок доштанд. Ҷамъшудаҳо ҳамчунин озодии маҳбусони сиёсиро дар Русия талаб карда, баъзе аз онҳо дар даст шиорҳое доштанд, ки ба табоддули зиндониён бо Украина даъват мекарданд.

Хотираи Борис Немтсовро дар Санкт-Петербург аз ду то се ҳазор одам гиромӣ доштанд. Тазоҳургарон дар майдони Ленин, дар наздикии истгоҳи Финляндский ҷамъ шуда, бо изҳори норозигӣ аз пайдо нашудани фармоишгарони куштори сиёсатмадори мухолиф тағйироти демократиро дар Русия талаб карданд.

Дар баъзе аз шаҳрҳои Русия, аз ҷумла Томск сокинон ба далели он ки мақомот ба баргузории таҷаммуъҳо иҷозат надоданд, маҷбур шуданд бо тазоҳуроти инфиродӣ хотираи Немтсовро гиромӣ доранд.

Борис Немтсов шаби 27 ба 28 феврали соли 2015 дар болои Пули калони Москва, дар маркази шаҳр кушта шуд. Панҷ гумонбари ин куштор - шаҳрвандони Чеченистон ба муҳлатҳои тӯлонӣ зиндонӣ шуданд. Вакили дифои духтари Немтсов Олга Михайлова 24 фервал дар суҳбат бо “Интерфакс” гуфт, наздикони сиёсатмадори кушташуда натавонистанд, дар робита ба раванди тафтишот маълумоте ба даст оранд.

Дар Кумитаи тафтишотии Русия пештар гуфтанд, тафтиши парвандаи узви пешини баталони "Шимол"-и ВКД Чеченистон Руслан Муҳиддинов идома дорад, ки фармоишгар ва созмондиҳандаи куштор шумурда мешавад. Муҳиддинов таҳти пайгарди қонунӣ қарор дорад.

XS
SM
MD
LG