Муассасанинг маълум қилишича, «жамоат жойларини ифлослантириш, сўкинишлар ва бошқа, атайлаб содир этилган қилмишлар, жамоатчиликка ҳурматсизлик» уларнинг ҳибсга олинишига сабаб бўлган.
Бундан ташқари, прокуратуранинг хабар қилишича, Жанаозенда яшовчи фуқарога нисбатан «ижтимоий, этник, ирқий нафрат уйғотиш» моддаси бўйича жиноий иш очилган. Жиноят кодексига биноан, бу жиноят учун икки йилдан етти йилгача озодликдан маҳрум этиш кўзда тутилган.
Бундан авалроқ, Мангистау вилоят полиция департаменти ишга жойлаштирилишларини талаб қилган, Жанаозенда истиқомат қилувчи айрим фуқаролар жавобгарликка тортилгани тўғрисидаги хабарларни инкор қилган эди.
Ўтган ҳафтада Жанаозенда истиқомат қилувчи ўнлаб аҳоли ҳукумат ўзларини юқори маош бериладиган ишга жойлаштиришини талаб қилган эди. Улар билан Мангистау вилоят прокурорининг ўринбосари Ержан Турмагамбетов учрашди. 27 феврал чоршанба куни, Жанаозенда полиция ходимлари томонидан «Озодлик» мухбирлари Сания Тойкен ва Санат Нурбеков ушланди. Полиция идорасида ушлаб турилганидан олти соат ўтиб улар қўйиб юборилди.
Сания Тойкеннинг хабар беришича, полицияда унга фуқаро Шаудировнинг аризасини кўрсатишган. Бу фуқаронинг ёзишича, у шаҳардаги хотиржамликдан хавотирга тушаётган экан, чунки «Озодлик» мухбирларининг Жанаозен аҳолиси билан суҳбати «нафрат уйғотишга» сабаб бўлиши мумкин экан. Бундан аввалроқ терговчи Назарбай Жанбаев Тойкен билан суҳбатда полицияга ариза келиб тушгани ва энди журналист «ҳимоя қилиш ҳуқуқига эга гувоҳ» эканини маълум қилган эди. Тойкеннинг маълум қилишича, полицияда ҳуқуқлари тушунтирилмаган ва адвокатнинг иштирокисиз сўроққа тутилган.
Жанаозен шаҳрида, Тойкеннинг хабар қилишича, хавфсизлик чоралари кучайтирилган – кўчаларда кўплаб полиция ва хизмат машиналарини учратиш мумкин, Бандлик бўлими ва «Нур Отан» партияси идораси олдида полиция автомобиллари турибди.