Бундан ташқари, УМЖТ “тизимли муаммо”га эътибор қаратди. Мазкур оммавий ахборот воситаси вакилларининг фикрича, бу украин ижрочиларининг “босқинчи давлат” ҳудудидаги концертлар ва гастролларда иштирок этиши масаласи билан боғлиқ. Украина қонунчилигида бундай тушунча фақат Россияга нисбатан ишлатилади. Украина миллий жамоат телерадиокомпанияси ушбу масала бўйича “жамоатчилик мулоқоти”ни ўтказилишини таклиф қилди.
Бундан олдин Brunettes shoot Blondes украин инди-рок гуруҳи, агар миллий саралаш ташкилотчилари уларни Украина номидан қатнашишни таклиф қилишса, Евровидениеда иштирок этмасликларини маълум қилганди. Бу ҳақда гуруҳ ўзининг Facebook’даги саҳифасида айтиб ўтган. Баёнотда қайд этилишича, мусиқачилар ўз қарорларини миллий саралашда биринчи ўринни эмас, балки фақатгина тўртинчи ўринни эгаллашгани билан изоҳлашган. “Бу сафар бизники эмас”, - деб ҳисоблайди Brunettes shoot Blondes.
УМТЖ аввалроқ бир нечта гуруҳлар Евровидениеда қатнашмасликка аҳд қилгани муносабати билан Украина ушбу танловда умуман иштирок этмаслиги мумкинлигини маълум қилганди. Украин қўшиқчиси Maruv Евровидениега боришни рад этганидан сўнг , Kazka ва Freedom-jazz гуруҳлари ҳам шу йўлдан борганди. Ушбу гуруҳлар украин миллий саралаш босқичида мос равишда иккинчи ва учинчи поғоналардан жой олишган.
Kazka гуруҳи ўз қарорини “одамлар ўртасида нифоқ уруғларини сочиш эмас, балки уларни бирлаштириш”ни хоҳлашётгани билан изоҳлашганди.
Саралашда ғолиб бўлган Maruv тахаллусли қўшиқчи(асл исми-шарифи Анна Корсун) Евровидениеда Украина номидан қатнашмаслигини билдирган. Корсун мухлислар берган овозлар ҳамда хайъат аъзоларининг юқори баҳолари эвазига ғалаба қозонган эди. Бироқ жамоатчилик ва танлов ташкилотчилари ичида у Украина томонидан расман босқинчи давлат дея тан олинган Россияда тез-тез концертлар бериб туриши шубҳа уйғотган.
Украина “Евровидение-2016” танловида биринчи ўринни эгаллаганди. Ўшанда қрим татар қўшиқчиси Жамала ушбу мамлакат номидан иштирок этган. Евровидениенинг 2017 йилги финалига эса Россия вакили бўлган Юлия Самойлова қўйилмаганди. Сабаби у босиб олинган Қримда қўшиқлар куйлаган экан.