Ссылки доступа

Уй ҳибсига олинган қозоғистонлик фаол Билаш “жиҳодга даъват”да айбланмоқда


Остона шаҳар прокуратураси томонидан 11 март куни тарқатилган хабарда рўйхатга олинмаган «Атажұрт еріктілерді» бирлашмаси фаоли Серикжан Билашнинг қўлга олинишига унинг ўтган ойда билдирган ошкора фикрлари сабаб бўлгани таъкидланади.

Прокуратуранинг маълум қилишича, келиб чиқиши Хитойдан бўлган Қозоғистон фуқароси Серикжан Билаш (ҳужжат бўйича у – Бияш, аммо у ўзини Билаш дея атайди, чунки унинг фамилияси Хитойда нотўғри ёзилган ва Қозоғистон ҳужжатларига ҳам шу хатолик “кўчиб ўтган”) Олмаотада бўлиб ўтган хотира маросимида “жиҳодга” чақириқ билан чиққан. Исломда Аллоҳ йўлида жанг қилишни англатувчи “жиҳод”, прокуратура хабарида “этник хитойликларга қарши уруш” сифатида талқин қилинган, давлат идорасининг версиясига кўра Билаш шунга чақирган.

Прокуратуранинг хабарига қараганда, 21 февраль куни Остона полиция департаментига маҳаллий аҳоли вакилидан ариза келиб тушганидан сўнг “нафрат қўзғатиш” моддаси бўйича тергов олиб борилмоқда. Ариза берган кишининг исми келтирилмаган.

«Серикжан Бияш чиқишидаги миллий нафратга чақириқ ижтимоий тармоқлардан олинган видеоёзувлар, гувоҳларнинг кўрсатмалари ва бошқа материаллар 2019 йил 5 март куни ўтказилган политологик экспертизанинг № 499 хулосаси бўйича тасдиқланди», - дейилади прокуратура сайтидаги хабарда.

Билаш 10 мартга ўтар кечаси Олмаотада ушланган ва Остонга олиб келинди. 11 март куни суд уни изолятордан озод қилиш ва уй қамоғига ўтказиш борасида қарор чиқарди. Шу билан бирга Билаш Остонада қолиши кераклиги таъкидланади, шуни айтиш керакки унинг уйи ва оиласи Олмаотада.

Билаш Шинжондаги қозоқларнинг ҳуқуқларини ҳимоя қилиш фаолияти билан ном қозонган, унинг «Атажұрт еріктілері» («Атажұрт» номи билан танилган) ташкилоти биринчилардан бўлиб Хитойда этник камчилик босим остида эканлиги билан боғлиқ масалани ва у ерда “сиёсий қайта тарбиялаш лагерлари” мавжудлигини кўтариб чиққан эди. Инглиз тилини яхши биладиган Билаш ва унинг ташкилоти сўнгги икки йилда Қозоғистон ва хорижий журналистларни таклиф қилган ҳолда қатор матбуот анжуманларини ўтказди. Анжуман иштирокчилари Хитойдаги қариндошларига ўтказилаётган босимлар, “лагерлар”, “Осмон ости мамлакати”дан чиқиб кетишда рухсатнома олишдаги мураккабликлар ҳақида гапириб беришди.

XS
SM
MD
LG