Ссылки доступа

CPJ аз Остона хост, ба кори хабарнигори Радиои Озодӣ монеа эҷод накунад.


Кумитаи ҳимоят аз рӯзноманигорон (CPJ) аз мақомоти Қазоқистон даъват кард, ки таъқиби хабарнигори Бахши қазоқии Радиои Озодӣ Сония Тойкен ва рӯзноманигорони дигарро барои бозтоби мавзуъҳои доғи иҷтимоӣ қатъ кунанд.

CPJ шаби 14 март бо нашри як изҳорот гуфт, мақомоти Қазоқистон бояд дархости Тойкенро дар робита ба радди ҷаримае бипазиранд, ки додгоҳ пас аз бозтоби эътирози бекорон дар Жанаозен бастааст. Дар изҳорот омадааст, ки рӯзноманигор дар посух ба бозтоби эътирози сокинон ба ҷавобгарии маъмурӣ кашида шудааст.

Сония Тойкен, ки бо сокинони бекор ва норозии Жанаозен суҳбат карда буд, шаби 11 март боздошт ва ба шуъбаи пулис интиқол дода шуд. Додгоҳи Жанаозен субҳи 12 март ӯро дар "нофармонӣ ба амри кормандони пулис" айбдор ва 50 ҳазору 500 танга (беш аз 130 доллар) ҷарима баст.

Худи Тойкен дар суҳбат бо намояндагони CPJ иддаои пулисро рад карда, ҷаримаи худро сиёсӣ номид. "Мақомоти Қазоқистон бояд таъқиби хабарнигор Сония Тойкен ва рӯзноманигоронеро қатъ кунанд, ки мавзуъҳои доғи иҷтимоиро бозтоб мекунанд", - гуфтааст сардори CPJ Карлос Мартинес де ла Серна.

Хабарнигори Бахши қазоқии Радиои Озодӣ тайи моҳҳои ахир бори севум аст, ки боздошт мешавад. Моҳи гузашта низ ӯ ҳамроҳи наворбардори радио Санат Нурбек барои бозтоби эътирози сокинони бекори Жанаозен дастгир шуд. Тойкен 12 феврал низ ҳангоми анҷом додани мусоҳиба боздошт ва ба шуъбаи пулиси Остона интиқол ёфта буд.

XS
SM
MD
LG