Путин ўз нутқида икки мамлакт ўртасидаги иқтисодий алоқалар ҳақида гапирар экан, жумладан «тинч атом соҳасида ҳамкорлик” масаласини тилга олиб ўтди.
Маҳаллий оммавий ахборот воситалари 4 апрел куни энергетика вазири ўринбосари Мағзум Мирзагалиевга таянган ҳолда хабар беришича, Шарқий Қозоғистонда Курчатов шаҳри ва Олмаота вилоятининг Улкен қишлоғи Россиянинг иштирокида атом стансиясини қуриш учун маъқул жойлар сифатида кўрилмоқда.
Расмий маълумотларга кўра, қурилишнинг муддати, аниқ жойи ва қувватти аниқланмаган ва бу масала бир неча йил давомида муҳокама қилиниб, ҳали қарор қабул қилинмаган. Шу билан бирга, вазирнинг сўзларига кўра, аҳоли фикри "албатта ҳисобга олинади".
Унинг айтишича, «уранни қазиб олиш ва тўйинтириш борасида олтита Россия-Қозоғистон корхонаси фаолият юритмоқда». Путиннинг баёнот беришича, Россия «ҳамкорликнинг янги формасига ўтишни”, аниқроқ айтганда, “Россия технологиялари асосида Қозоғистонда АЭС қуриш имкониятини”таклиф қилмоқда.
Путиннинг хабар беришича, Токаев билан музокаралар доирасида “гуманитар алоқалар” ҳам муҳокама қилинган. Унинг сўзларига кўра, «Қозоғистонда Россиянинг янги мактаб ва университетларини ташкил қилиш режалари ишлаб чиқилмоқда», шунингдек Олмаотада “Россия фан ва маданият маркази филиалини очиш” кўриб чиқилмоқда.
Россия президентининг баёнотига қараганда, унинг Токаев билан навбатдаги учрашуви 29 май куни Қозоғистон пойтахтида бўлиб ўтади. Ўша куни ЕвроОсиё Иқтисодий Иттифоқи ташкил этилганининг беш йиллиги муносабати билан ЕвроОсиё Иқтисодий Олий Кенгашининг мажлиси бўлиб ўтади. Учрашув жойи Нур-Султон шаҳри танланганига изоҳ берган Путин: «Биз Иттифоқ ташкил этилишида ЕвроОсиё интеграция лойиҳаси ғоясини илгари сурган Нурсултон Абишевич Назарбоев шахсан катта хизмат қилганлигини таъкидлаб ўтмоқчимиз», деди.
20 март куни президет сифатида қасамёд қабул қилган Токаевнинг Москвага ташрифи унинг илк хорижий сафари бўлди. Токаев 30 йил ҳокимият тепасида бўлган Нурсултон Назарбоев истеъфога чиққанидан кейин президентликни қабул қилиб олди. Президент лавозимидан кетган бўлишига қарамай Назарбаев конституциявий орган ҳисобланмиш Хавфсизлик Кенгаши раҳбари ва ҳукмрон «Нур Отан» партияси раиси лавозимларини сақлаб қолди. Унга шунингдек, фахрий сенатор мақоми берилган.