Ссылки доступа

Сиёсатчи Омурбек Бабанов ўзига нисбатан таъқибни тугатиш борасида талабларини айтди


Парламентдаги «Республика – Ата Журт» фракцияси собиқ раҳбари, президент сайловларида ҚР раҳбарлиги учун даъвогарлик қилган Омурбек Бабанов 9 апрел куни НТС телеканалига интервью бериб, нима учун мамлакатни тарк этганини тушунтириб берди.

Жумладан, у сайловлардан сўнг, хорижда даволанаётган бир вақтда ўзига нисбатан жиноий иш очилганини, ўз тарафдорлари ва «Республика – Ата Журт» фракцияси депутатларини қўрқитиш бошлангани, депутатларни президент аппарати раҳбарининг собиқ ўринбосари Икрамжан Илмиянов ўз хонасига чақирганидан хабардор бўлганини таъкидлади.

«Мени қўллаб-қувватлаганларни ишдан бўшатишди, яна бирини милицияга чақиришди ва мен Туркияда бўлганимда Руслан Казакбаев (парламент депутати) билан учрашиб ундан Атамбаев, Жээнбеков (ҳукумати)дан менинг тарафдорларимни таъқиб қилмасликлари учун нима қилишим зарарурлигини билиб беришини сўрадим. Ўшанда бир нечта талаб қўйилди: яъни мен сиёсатдан кетишим ва депутатлик мандатимни топширишим кераклиги, энг асосийси бир йил давомида Қирғизистонга қайтмаслигим керак эди», - дейди Омурбек Бабанов.

Сиёсатчининг тан олиб айтишича, бунга жавобан ўзи ҳам бир нечта, жумладан тарафдорларига босимларни ва таъқибларни тўхтатиш талабини қўйган, музокаралар бир ойга яқин давом этди. Сиёсатни тарк этиш тўғрисидаги ўзининг қарорини эслаган Омурбек Бабанов “ўз ваъдасига вафо қилганини” эслатиб қўйди ва ҳамон мамлакат ташқарисида эканини билдирди.

«Бироқ менга нисбатан очилган жиноий иш ҳамон тўхтатилмаган, ахир нафақат Қирғизистон, балки Россиядан бўлган тўртта экспертлар гуруҳи у ерда ҳеч нарса йўқлигини айтишган эди-ку. Бу масала бўйича музокораларни Руслан Казакбаев олиб борди. У Сооронбай Шарипович [Жээнбеков] олдига кирганида, у “бу ҳақда биламан, бу масалаларни ҳаммасини Алмазбек Шаршенович билан ҳал қилинг” деган. Мана шунақа гаплар», - дея хулоса қилади Омурбек Бабанов.

2017 йилда бўлиб ўтган президентлик сайловларидан сўнг Омурбек Бабанов мамлакатни тарк этган ва сиёсий карьерасини якунлаши ҳақида баёнот берган эди. Бабановга нисбатан иккита жиноий иш очилган. Биринчи жиноий иш – ҚР Жиноий Кодексининг 299-моддаси 1-қисми («Миллий, ирқий ёки диний нафрат уйғотиш») бўйича Ўш шаҳрида сайлов олди тарғиботи чоғида айтган фикрлари учун қўзғатилган. ҚР ЖКнинг 297-моддаси 1-қисми («Конституциявий тузимни зўрлик билан ўзгартиришга очиқча даъват») жиноят аломатлари бўйича очилган иккинчи жиноий иш тўхтатилган.

XS
SM
MD
LG