Ссылки доступа

Бишкекда сиёсатчи Омурбек Бабанов қайтиши муносабати билан кенг қамровли тинч йиғилиш ўтказиш кутилмоқда


«Республика» партияси Бишкек шаҳар ҳокимиятини пойтахтнинг эски майдонида 13 апрел куни тинч йиғилиш ўтказишидан хабардор қилди. Бу ҳақда шаҳар мэри Азиз Суракматов номига партия раиси Айсулуу Молдожунуева томонидан юборилган мактубда таъкидланади.

Тадбир вақтида президентликка собиқ номзод Омурбек Бабановнинг ўз тарафдорлари, сиёсий ва жамоат арбоблари билан учрашуви режалаштирилган. Ташкилотчилар тадбирда10 мингга яқин кишининг иштирок этишига умид қилишмоқда.

Партия шаҳар бошлиғига мурожаат қилар экан иштирокчилар хавфсизлигини таъминлаш ва жамоат тартибини сақлашни сўради.

Бундан аввалроқ Бабанов ўзининг «Фейсбук»даги саҳифасида Бишкекка13 апрел куни учиб боришини маълум қилган эди.

2017 йилда бўлиб ўтган президентлик сайловларидан сўнг Омурбек Бабанов мамлакатни тарк этган ва сиёсий карьерасини якунлаши ҳақида баёнот берган эди. Бабановга нисбатан иккита жиноий иш очилган. Биринчи жиноий иш – ҚР Жиноий Кодексининг 299 моддаси 1 қисми («Миллий, ирқий ёки диний нафрат уйғотиш») бўйича Ўш шаҳрида сайлов олди тарғиботи чоғида айтган фикрлари учун қўзғатилган. ҚР ЖКнинг 297 моддаси 1 қисми («Конституциявий тузимни зўрлик билан ўзгартиришга очиқча даъват») жиноят аломатлари бўйича очилган иккинчи жиноий иш тўҳтатилган.

Март ойида Миллий Хавфсизлик Давлат Қўмитаси баёнот бериб, Бабанов мамлакатга қайтиб келиши билан унга нисбатан қонун доирасида чора кўрилишини маълум қилган эди.

XS
SM
MD
LG