Давлат раҳбари матбуот хизмати тарқатган хабарга қараганда, ташрифнинг биринчи куни, 15 апрелда, Сооронбай Жээнбеков Мюнхенда Бавария Давлат девонхонасида Федерал ва Европа масалалари ҳамда ОАВ масалалари бўйича Бавария давлат вазири Флориан Херманн, Бавария бош вазирининг ўринбосари - Иқтисод, тараққиёт ва энергетика давлат вазири Хуберт Айвангер билан учрашади, шунингдек Х.Зайдел номли жамғармада Бавария жамоатчилик вакиллари ва сиёсий арбоблари олдида чиқиш қилади ҳамда қирғиз-немис бизнес-форуми очилишида иштирок этади. Бундан ташқари ҚР президенти «Pellmeyer» қишлоқ хўжалик корхонасига боради ва ватандошлар билан учрашади.
16 апрел куни эса Берлинда Қирғизистон раҳбарининг ГФР федерал президенти Франк-Вальтер Штайнмайер ва Германия федерал канцлери Ангела Меркель, шунингдек Бундестаг президенти Вольфганг Шойбле билан учрашуви режалаштирилган. Сооронбай Жээнбеков ва Ангела Меркель матбуот учун баёнот беради.
Сооронбай Жээнбековнинг Германияга расмий ташрифи якунлари бўйича дипломатик муносабатлар, иқтисод ва саноат, қишлоқ хўжалиги ва агросаноат мажмуаси, таълим, туризмни ривожлантириш ва савдо-иқтисодий, молиявий соҳаларга қаратилган икки томонлама бир қатор ҳужжатларнинг имзоланиши кутилмоқда.