Ссылки доступа

ҚР бош вазир ўринбосари: «ЮрАзия» уран конининг ёпилишига эътироз билдирмаяпти


Бош вазирнинг биринчи ўринбосари Қубатбек Боронов парламентда баёнот бериб, «ЮрАзия в Кыргызстане» (“Қирғизистондаги ЮрОсиё”) компанияси Иссиқкўл вилоятидаги уран конини ўзлаштириш борасидаги лицензияси бекор қилинганига эътироз билдирмаётганини айтди.

«Биз «ЮрАзия» билан музокаралар олиб бордик. Улар жамиятдаги хавотирларни инобатга олишди ва бирор бир эътирозларсиз бунга рози бўлишди», -деди бош вазир биринчи ўринбосари депутатларнинг саволларига жавоб берар экан.

Апрел ойида Қирғизистонда Иссиқкўл вилоятининг Тошбулоқ конида уран қазиб олиниши борасидаги хабарлар фонида уран конини ўзлаштиришга қарши мамлакат бўйлаб норозиликлар авжига чиқди. Фаоллар Бишкек ва конинг ўзида норозилик акциясини уюштирдилар.

Бугун ҚР Иссиқкўл вилоятининг Қоракўл шаҳрида уран конини ўзлаштиришга қарши митинг бўлиб ўтди. «Азаттық»нинг минтақадаги мухбирининг хабар қилишича, акцияда 40га яқин маҳаллий фаол иштирок этмоқда. Иштирокчилар «Иссык-Куль - не свалка!», «Нет урану!» (“Иссиқкўл чиқиндихона эмас”, “Уранга йўл йўқ) каби шиорларни кўтариб олишган эди, улар нафақат Иссиқкўл вилоятида, балки бутун Қирғизистон бўйлаб уран қазиб олинишига қарши чиқмоқда.

Тошбулоқ уран кони Иссиқкўл ва Норин вилоятлари чегарасида жойлашган. «ЮрАзия в Кыргызстане» ОАЖ фойдали қазилмаларни разведка қилиш учун 2010 йилда лицензия олган. Компаниянинг ўзи эса уран қазиб олишда экологияга бирор бир хатар туғдирмайдиган хавфсиз технологиядан фойдаланмоқчи эканлигини айтмоқда. Шу билан бирга инвесторлар геологияразведка ишлари учун 271 млн сом киритишди.

22 апрел куни ҳукумат экологик экспертиза тугагунга қадар уран конидаги ишлар тўхтатилиши юзасидан кўрсатма берди ва разведка ва урагн қазиб олишга берилган лицензияни қайтариб олди. Парламентдаги айрим депутатлар 2070 йилга қадар Қирғизистонда уран разведкаси ва қазиб олинишига мораторий жорий қилиш борасидаги қонун лойиҳаси таклифи билан чиқдилар.

Айни дамда уран кони разведкаси учун 18та лицензия берилган.

XS
SM
MD
LG