Ссылки доступа

Ўшда «Азаттиқ» журналисти Идирис Исаковга ҳужум уюштирилди


Ўш шаҳрида яширин казинонинг эҳтимолий жойини суратга олиш жараёнида «Азаттиқ» (“Озодлик” радиосининг қирғиз хизмати) журналисти Идирис Исаковга ҳужум уюштирилди.

Унинг юзи, қўли жароҳатланди, кийимлари йиртилди. Ҳодиса жойига милиция ходимлари етиб келиб ҳужум қилганларни ушлади. Шунингдек “Нур” телеканали журналисти ҳам жароҳат олди. Ҳужум қилганлар унинг қўлини қайирган ҳолда бино ичида ушлаб туришди.

Исаков DeLuxe меҳмонхонаси яқинида яширин казино жойлашгани эҳтимол қилинаётган жойда суратга олиш вақтида ҳужумга учради. Журналистга эр-хотин мурожаат қилиб, фарзандлари казинода катта миқдордаги пулни ютқазиб қўйганини айтишган. Уларнинг сўзларига қараганда, яширин казино бу ерда 2017 йилдан бери фаолият юритаётган экан. Казино фаолият юритаётганидан бери, ота-оналарнинг таъкидлашича, ўғиллари 50 минг доллар ютқазган. Улар маблағларнинг қайтарилишини ва президентга шикоят қилишларини айтиб, баёнот беришди.

Қирғизистонда казино 2012 йил 1 январдан бошлаб тақиқланган. 2015 йилнинг 29 апрелдан эса мамлакатда букмекер идоралари ва пул тикиш тақиқланди.

Аммо тақиқларга қарамай, казино яширин тарзда фаолият юритмоқда. Бу ҳақда Жўқорғу Кенеш депутатлари бир неча бор гапиришган.

XS
SM
MD
LG