Ссылки доступа

Рӯзноманигор Маҳмуд Раҷаб: аз Интернет огаҳ шудам, ки зиддам парванда боз кардаанд


Вазорати умури дохилии Ӯзбекистон хабар дод, ки зидди шоир ва рӯзноманигор Маҳмуд Раҷаб парвандаи ҷиноӣ боз ва тафтишот оғоз шудааст.

Ба огаҳии вазорат, ба боз шудани парвандаи мазкур 26 китоб ва навору видеоҳои телефони мобилие сабаб шуданд, ки 26 марти соли равон марзбонон дар фурудгоҳи Тошканд аз рӯзноманигор мусодира карданд.

Дар иттилоияи вазорат ҳамчунин бозҷӯии манзили зисти Маҳмуд Раҷаб низ шарҳ дода шудааст. "Ҳангоми бозҷӯӣ аз хонаи шаҳрванд Маҳмуд Раҷаб як телефони мобилӣ, ноутбук, чандин фита ва се китоб (аз ҷумла китоби "Таърихи паёмбарон"-и мухолифи ӯзбек Муҳаммад Солеҳ) барои омӯзиш мусодира карда шуд", - омадааст дар иттилоия.

Худи Маҳмуд Раҷаб гуфт, дар Интернет хондааст, ки зиддаш парвандаи ҷиноӣ боз кардаанд. "То имрӯз касе маро аз эълон шудани айб расман огаҳ накардааст. Онҳо ҳатто ба дархости вакили дифоам дар ин бора посух надоданд. Бо сабабҳое хабари боз шудани парвандаро пинҳон медоранд. Имрӯз изҳороти онҳоро хондам, ки пур аз ҳарфҳои дурӯғ аст", - афзуд Маҳмуд Раҷаб.

Дар фурудгоҳи шаҳри Тошканди Ӯзбекистон охирҳои моҳи март аз Маҳмуд Раҷаб телефони ҳамроҳ ва 26 китоб мусодира карда буданд.

Маҳмуд Раҷаб ҳангоми бозгашт аз шаҳри Тифлиси Гурҷистон дар Истамбул бо Муҳаммад Солеҳ мулоқот кард, ки дар Туркия паноҳ мебарад. "Бародар ва дигар ҳаводорони Муҳаммад Солеҳ аз ман хоста буданд, ки китобҳояшро биорам", - мегӯяд Маҳмуд Раҷаб.

Аммо дар гумруки фурудгоҳи Тошканд китобҳоро аз рӯзноманигор мусодира карданд. Кормандони интизомии Ӯзбекистон 10 май манзили зисти рӯзноманигорро низ дар ноҳияи Гурлани вилояти Хоразм кофтукоб намуданд.

XS
SM
MD
LG