«Азаттыктын» түркмөн кызматынын маалыматына караганда, учурда мындай талап шаардын Гарашсызлык жана Битарап Түркмөнстан көчөлөрүндөгү үйлөрдө жайгашкан фирмаларга карата айтылууда. Бирок алардын көбү шаардын борборунда калуунун башка жолдорун издеп жатышат.
«Анча чоң эмес фирмалардын көбү Мир кичирайонундагы үйлөрдүн жертөлөлөрүнөн кеңселерди ижарага алууну каалап жатышат. Бирок жергиликтүү бийлик өкүлдөрү менен полиция жертөлөлөрдө рейддерди жүргүзүүдө. Алар андагы ижарачылардын документтерин текшерип, Өнөр-жай аймагына баргысы келбей, жаңы келишим түзгөндөрдү аныктап жатышат», — деп жазды басылма.
Майдын ортосунда баш калаанын бийлиги бардык кеңселерди шаардын четинде жайгашкан Өнөр-жай аймагына көчүрүү чечимин кабыл алганы белгилүү болгон.
Өнөр-жай аймагы — Ашхабаддын четиндеги Бедев районунда кеңсе имараттары, соода жайлары курулуп жаткан аймак. Ишкерлер ал жерге көбүнчө ижара акылардын жогору экендигинен улам баргылары келбей жатканы айтылууда.
