Врачларнинг айтишича, филиал директори кафедра мудирларига ўзлари уста гаплашиб, кафедра эгаллаган хона(лар)ни ҳамда коридорларни ўз ҳисобларидан таъмир қилишни буюрган. Врачлар ўз иддаоларининг тасдиғи сифатида Телеграмдаги ёзишмаларнинг скриншотларини тақдим этди.
Республика ихтисослашган онкология ва радиология илмий-амалий тиббиёт марказининг Тошкент шаҳар онкология филиали врачлари кафедралар таъмири учун ҳар бир шифокордан бир миллион сўмдан кўп пул йиғилаётгани ҳақида ёзди:
“Бизлар ишлайликми, оила боқайликми ёки ремонт қилайликми? Бизда ассистент бўлиб ишлайдиган Ўктам исмли врач ҳамма шифокорларга телефондан хабар юборди. Кафедралар ремонтини ўзимиз кўтаришимиз керак экан, директорнинг буйруғи деб ёзибди. Агар ким пулни тўламаса, касал кўриш, операция қилишга касал бермас экан. Врачлар бошини чангаллаб қолди, нега давлатимиз барча таъмир ишларига пул ажратиб турган бўлса-да, бизнинг ҳисобимиздан ремонт қилишлари керак?”
Врачлар Ўктам исмли ассистентдан уларга Теlegram тармоғи орқали келган хабарлар скриншотини ҳам тақдим қилди:
“Директорнинг буйруғи келди. Кафедрани ўзимизни ҳисобимиздан ремонт қилишимиз керак экан. Шунга ҳозир Нигора Эргашевна билан биргаликда устани гаплашдик ва 2 та кафедрага 10 000 000 сўмдан тушди.
Ҳар бир ходимдан 1 286 000 сўмдан тушди.
Ким қарши бўлса клиникада бемор курация (касал қабул қилиш, ташхис қўйиш, уни даволаш – таҳр.) қилишига рухсат берилмас экан.
Скриншотда пул топшириши шарт бўлган 7 врачнинг фамилияси ҳам ёзилгани акс этган.
Онкология кафедраси ассистенти Ўктам Қурбонқулов врачлардан таъмир учун пул йиғилаётганини инкор қилди. Унинг шахсий Телеграмидан врачларга ёзган хатлари борлигини эшитганидан сўнг, “менинг исмимдан ёзилган нарсаларни берсангиз, судга бераман”, деди.
Врачлардан бирининг айтишича, улар ишсиз қолишидан хавотир олиб бирин-кетин таъмир харажатини бермоқда:
“Ҳар куни эрталабки мажлис шу гапдан бошланади. Ҳар куни пулни тезроқ топшириш талаб қилиняпти. Ҳамма бунинг ноқонуний эканлигини билади, лекин касалсиз, ишсиз ўтириб қолишидан қўрқиб, ҳеч ким норозилик билдира олмаяпти”.
Онкология кафедраси мудири Нигора Атахонова врачлардан таъмир учун пул йиғилаётгани ҳақидаги гапларни инкор этар экан, шахсан ўзи пул бермаганини айтди: “Ҳеч қанақа пул йиғилгани йўқ, лично мен берганим йўқ”.