Олмаотадаги Олмали туман судида 19 июн куни судья Қайрат Иманқулов раислигида прокурор Ерлан Молдахметов иштирокида ўтган суд жараёни тўлалигича теологнинг ҳисоботини тинглашга бағишланди.
Ал Фаробий номли ҚозМУ диншунослик кафедраси доценти, филология фанлари номзоди Мухитдиновнинг сўзларига қараганда, бошқа экспертизаларда ишлатилган айрим иборалар жисмонан зўравонликка чақириқ сифатида талқин қилинган. Шу билан бирга, теологнинг фикрича, иборалар диний оппонентларнинг камолати йўлидаги чақириқ ҳисобланади.
Бу иш бўйича навбатдаги суд жараёни 20 июн, пайшанба кунга белгиланди. Унда судланувчиларнинг сўроқ қилиниши кутилмоқда.
Бу иш бўйича айбланаётган Қозоғистоннинг турли минтақаларидан бўлган 9 нафар эркак 2018 йилнинг октябрида ҳибсга олинган эди. МХҚнинг Олмаота вилоят департаменти жиноий ишни «Б.К.Ш» исмли фуқаронинг аризаси бўйича очди, у «Аҳли сунна Вал-Жамаат» гуруҳи аъзолари WhatsAppда “диний мавзуни” фаол мухокама қилганини ёзган эди.
Айблов томонининг фикрича, судланувчилардан бири 2013 йилнинг 2 декабрида WhatsApp мессенжерида “терроризм ва салафизм ғояларини тарғиб қилиш” ва “мазкур оқим ақидаларига амал қилиш” мақсадида гуруҳ очган ҳамда унга 8 нафар “ҳаммасолаги”ни киритган.
Айблов томоннинг таъкидлашича, 2018 йилги политологик экспертиза уларнинг хабарлари матнида ва фикрларида “диний нафрат қўзғаш аломатлари” мавжудлигини аниқлади. 2018 йил октябрида ўтказилган суд-диний экспертиза матнларда “ваҳоббийлик оқимининг салафийлик йўналиши ғоялари” ва “диний-радикал қарашлар тарғиб қилинган”, дея хулосага келди.
2016 йил ёзида Оқтобеда юз берган қуроли ҳужумдан сўнг ҳукумат диний озчиликка қарши кўрилаётган чораларни кучайтирди. Оқтобеда етти киши ва Олмаотада 10 кишининг ҳалок бўлишига олиб келган қуролли ҳужумларни, расмий хабарларда айтилишича, “радикал кўз қарашдаги ноанаънавий диний оқим тарафдорлари” содир этган.
Айрим ҳуқуқ ҳимоячиларининг фикрича, ҳукумат сиёсий мухолифат ва ўзгача фикрловчиларга қарши курашда жиноят кодексидаги “тушунарсиз” қоидалардан фойдаланмоқда, жумладан нафрат уйғотиш, терроризм тарғиботи ва экстремистик ташкилот фаолиятида иштирок этиш айбини қўймоқда.