Ссылки доступа

Хитой “Талко” модернизацияси учун ярим миллиард доллардан кўпроқ сармоя ётқизади


“Талко” алюмин компанияси яқин икки йил мобайнида Хитойнинг China Machinery Engineering Corporation (CMEC) компанияси томонидан модернизация қилинади.

Бу борадаги тегишли Битим апрелда Пекинда имзоланган, 15 июн куни Душанбеда Тожикистон ва Хитой раҳбарлари иштирокида ратификация қилинди. Келишувга кўра модернизация қиймати 545 млн долларни ташкил қилади, унга кўра ишлаб чиқариш линияси янгиланади ва қуввати бир йилда300 минг тонна алюмин ишлаб чиқаришга етказилади.

Битимнинг имзоланиши Тожикистоннинг Хитой билан ҳамкорлиги борасидаги энг мухим ютуқларидан бири ҳисобланади. Чунки Хитой Тожикистоннинг асосий кредитори ва муҳим инвестори ҳисобланади. Тожикистоннинг умумий ташқи қарзи 2019 йил апрель ҳолатига кўра 2 млрд 915 млн долларни ташкил қилади, шундан 80% Хитой ҳиссасига тўғри келади. Ҳозирча қандай талаблар билан Хитой “Талко” моденизациясига инвестиция киритиши аниқ эмас.

Худди пахта хом-ашёси сингари алюминий Тожикистоннинг стратегик ва асосий экспорт маҳсулоти ҳисобланади, аммо сўнги йилларда унинг нархи жаҳон бозорида тушиб кетмоқда. ЕИнинг Марказий Осиё бўйича янги Стратегиясининг матнида таъкидланишича, алюминий Тожикистоннинг ЕИга экспорт қиладлиган асосий товаридир: 2007 йилда 268 млн евролик алюмин экспорт қилинган бўлса, 2018 йилда етказиб бериш қисқарди ва пул ҳисобида 47 млн еврога тушиб қолди.

«Талко»нинг хабар қилишича, 2018 йилда корхонанинг даромадлари атиги 18 млн долларни ташкил қилди, бу республика миқёсида денгиздан томчидир. Мана шу факт 2018 йил якунларига бағишланган ҳукумат мажлисида мамлакат президенти Эмомали Раҳмон томонидан ташвиш билдирилган ҳолда қайд қилиб ўтилди.

Бугун компаниянинг умид қилишича, корхона модернизация қилинганидан сўнг алюмин ишлаб чиқариш оширилади, ҳаражатлар эса камайтирилади. “Талко” компаниясининг жамоатчилик билан алоқалар департаменти раҳбари Игор Саттаровнинг сўзларига қараганда, ўтган йили корхона томонидан 96 минг тонна алюмин ишлаб чиқарилган, бу йил эса ишлаб чиқариш 20% кўпайиши кутилмоқда. Унинг айтишича, эришилган Шартномага биноан корхонанинг иккита цехи модернизация қилинади: уларга 428 та янги электролизли ванна ўрнатилади.

«Фақат мана шу иккита цехда биз алюминий ишлаб чиқаришни бир йилда 300 минг тоннага етказишни режалаштирганмиз, бу корхона лойиҳа қувватига тенгдир», - дея хабар беради Саттаров.

“Талко” модернизацияси бош пудратчиси - China Machinery Engineering Corporation (CMEC) – 1978 йилда асос солинган Хитой машинасозлик инжиниринг корпорацияси бўлиб, акцияларнинг 70% дан кўпроғи ХХР ҳукуматига тегишлидир.

XS
SM
MD
LG