Комиссия раиси, «Ата Мекен» фракцияси аъзоси Қанибек Иманалиев ўз чиқишида Атамбаевдан дахлсизлик мақомини олиб ташлаш жараёни икки ҳафта давом этиши мумкинлигини айтди.
«Коинотга парвоз қилган фазогирдан парвозга тайёргарлик 10 йил давом этган ҳолда скафандрни ечиб олиш учун атиги бир дақиқа талаб қилинади. Биз сиёсий фазогирдан скафандрни ечиб олишимиз учун икки ҳафта талаб қилинади. Агар биз икки ой ишласак-чи? У ҳолда сиёсатчилар бизни танқид қила бошлашади ва бизни Атамбаевни қўллаб қувватлашда, ишни чўзишда айблай бошлайдилар», - деди Иманалиев.
Унинг қўшимча қилишича, депутатлик комиссияси собиқ президентга айблов қўя олмайди, фақат гумонлар учун асос бўлган материалларга баҳо бера олади.
18 июн куни парламентнинг иккита қўмитаси комиссиянинг Атамбаевга қарши қўйган айбловларни қўллаб-қувватлади. Эндиликда комиссия хулосалари парламент томонидан кўриб чиқилиши керак. Комиссия раиси Қанибек Иманалиевнинг журналистларга айтишича, собиқ президентдан дахлсизлик мақомини олиб ташлаш жараёни 8 та босқичдан иборат бўлади.
Аввалига комиссия Алмазбек Атамбаевга қарши 9 та айблов қўйди, аммо муҳокамалардан сўнг 6 тасини қолдирди, 3 таси Атамбаевнинг президентлик муддатига тааллуқли эмас эди.
Қисқача комиссия айблови ҳақида: депутатлар, судлар, жамоат арбоблари ва ОАВни таъқиб қилиш, жиноий авторитет Азиз Батукаевни қонунга зид равишда озод қилиш, қонунга зид равишда Қой Тош қишлоғида участкага эга бўлиш, бу ерга Атамбаев уй қурган, «Ака Петролеум» ва«АКА Инвест» компанияларига эҳтимолий боғлиқлик, Бишкек ИЭМ модернизациясида коррупция, Бишкек ИЭМга кўмир етказиб берилишида қонунга зид равишда эхтимолий алоқаси борлиги.
Собиқ президент Алмазбек Атамбаев тарафдорларидан иборат ҚСДП партияси айблов қўйиш учун Атамбаевдан дахлсизлик мақомини олиб ташлаш мақсадида ташкил этилган депутатлар комиссиясини тузиш чоғида Конституция бузилганини маълум қилди.