Агентликнинг маълум қилишича, судья Филип Бартл гаров эвазига Назарбаевни озод қилган, ҳамда унинг иши бўйича “келаси йилнинг 20 мартига” белгиланган эшитувлар бошлангунга қадар у, "Priory Group шифохоналарининг бирида бўлиши ва даволаниши" бўйича шарт қўйди. Шунингдек таъкидланишича, шу вақтга қадар Назарбаев Лондон жанубий-ғарбидаги Уандсворт қамоқхонасида ушлаб турилган эди.
Агентликнинг маълум қилишича, Назарбаев 5 июнь куни полиция ходими Росса Сэмбрукка ҳужум қилганликда айбланмоқда. Констебль гўёки Назарбаевнинг хонадонида бегона кишини аниқлаган. Court News UK маълумотига кўра, судда ҳуқуқ тартибот идораларининг ходимларини “икки кун аввал” Назарбаевнинг International Park Plaza Hotel меҳмонхонасидаги хонасига чақиришган, ўшанда у "балконга чиққан ва у ердан ўзини ташлаш" билан пўписа қилган.
Агентлик прокурор Грегор МакКинлининг 26 июн куни хабарини иқтибос сифатида келтиради: "Бу холатда судланувчи Тависток кўчасидаги хонадондан топилди. У ерда полиция ходимлари билан жанжал чиқди. Зобитлардан бири тишлаб олингани боис жиддий равишда жароҳат олди".
РБКнинг ёзишича, Скотленд-Ярд баёнот бериб, Айсултан Назарбаев исмли инсон Лондондаги хонадонлардан бирида ўз жонига қасд қилишга уринган ва унга ҳалақит бермоқчи бўлган полиция ходимни тишлаб олган. РБКнинг таъкидлашича, бу ерда гап Қозоғистон собиқ президенти (мамлакатни салкам 30 йил бошқарган ва 2019 йил мартида истеъфога кетган) Нурсултан Назарбаевнинг набираси, унинг катта қизи Дариға Назарбаеванинг ўғли ҳақида бормоқда.
Айсултан Назарбаев – Қозоғистон сенати спикери Дариға Назарбаева, шунингдек Роҳат Алиевнинг иккинчи ўғлидир.