Жиноий иш кўриб чиқилаётган Ленинград ҳарбий округ судида чиқиш қилган Баҳром Эргашев ўзи ва яна бир неча киши ушлаганидан кейин Тергов қўмитасига олиб келинганликларини айтди. У ерда ҳамманинг юкларини олиб қўйишди, аммо Эргашевнинг айтишича, фақат унинг рюкзагини махсус пакетга ўрашмади. Шунда ҳибсга олинган шахс «нима учун?» дея сўраганида, терговчи бу Эргашевнинг иши эмаслигини айтган. Айбланувчининг фикрича, портловчи моддаларни унинг шахсий буюмлари орасига атайлаб солиб қўйишган.
«Мен қурилишда ишлайман ва гексоген нима эканини билмайман! – дейди Эргашев. – Мен бу ишни содир этиш учун физика ва кимёни тушунмайман».
Петербург метросидаги теракт 2017 йилнинг 3 апрел куни содир бўлди. Бунинг оқибатида 16 киши ҳалок бўлиб, юздан ортиқ киши жароҳат олди.
Тергов версиясига кўра, портлаш ўзини ўлимга ҳукм қилган террорчи Акбаржон Жалилов томонидан содир этилган. Тергов якунлари бўйича жами 11 киши ушланди. Ушланганлардан ҳеч ким теракт бўйича айбловни тан олмаяпти. Улардан камида уч нафари кўрсатма олиш мақсадида ФХХ томонидан қийноққа солинганликларини айтишди.