Рахмон Қырғызстанға 26 шілдеде келген. Екі ел басшысы Исфарадағы кездесуден кейін, Ыстықкөлге барған.
Үшкүндік кездесудің басты тақырыбы қырғыз-тәжік шекарасын делимитациялау мен демаркациялау болған. Қырғызстан президентінің баспасөз қызметі екі ел басшысы шекараны тездетіп бекітуге келісті деп қысқа ғана ақпарат берді. Ал Тәжікстан басшысының баспасөз қызметі кездесуде әлеуметтік-экономикалық ынтымақтастыққа баса назар аударылды деп атап өтті.
Қырғыз президенті Сооронбай Жээнбеков «шекара аймағында тарихи келіссөз өткіздік» деп Эмомали Рахмонға қолдағаны үшін алғысын жеткізді.
Тәжік-қырғыз шекара аймағында тұратын тұрғындар арасында шешімі таппаған жер үшін жиі дау шығады. Соңғы рет 22 шілдеде Қырғызстанның Ак-Сай ауылы мен Тәжікстанның Ворух анклавындағы тұрғындар арасында қақтығыс болып, 20-ға жуық адам зардап шеккен.
Қырғызстан мен Тәжікстанның ортақ шекарасы 970 шақырымға созылып жатыр, соның 519 шақырымы ғана келісілген.