Кечки эфирда намойиш қилинган лавҳада, туркман етакчиси велосипедда, отда сайр қилаётгани ва автоматик қуролдан ўқ отаётганини кўриш мумкин. Давлатга тегишли ТВнинг хабар қилишича, Бердимуҳамедов спорт автомобили рулини бошқарган ҳолда Қорақум чўлигача борган, шундан сўнг “Жаҳаннам дарвозаси” номи билан танилган Дарвоза газ кратеригача борган.
Бу унинг сўнгги ўн кунда ТВдаги илк кўринишидир. Унингўлими ҳақида миш-мишлар тарқалганидан кейин сўнги бор уни 24 июль куни ТВда кўрсатишган эди. Бироқ, 24 июл куни намойиш қилинган лавҳалар телемутахассисларнинг шубҳасига сабаб бўлди, уларнинг фикрича бу лавҳалар шу йилнинг 10 май куни “Ватан” дастурида кўрсатилган лавҳаларга ўхшаб кетади.
Бундан аввал расмий ОАВ Туркманистон раҳбари 15 июлдан 15 августга қадар расман меҳнат таътилига чиқиши борасида хабар берган эди. Бердимуҳамедов аввалги йилларда бу каби узоқ меҳнат таътилига чиқмаган эди. Бундан ташқари, у дам олишда бўлган тақдирда ҳам давлатга тегишли ОАВ ҳар куни мамлакат президентининг нималар билан бандлиги борасида хабар бериб турарди. Узоқ муддат президентнинг кенг жамоатчилик ва медиада кўринмагани мамлакат аҳолиси ўртасида турли миш-мишларни келтириб чиқарди, дея хабар беради “Озодлик” радиоси туркман хизматининг мамлакатнинг турли минтақаларидаги мухбирлари.
21 июль куни ижтимоий тармоқларда давлат раҳбарнинг 20 июль куни вафот этгани борасида хабар тарқатилди. Ўша куни ТАСС ахборот агентлиги Туркманистоннинг Россиядаги элчихонасига таянган ҳолда Туркманистон президенти Гурбангули Бердимуҳамедовнинг ўлими тўғрисидаги хабар ҳақиқатга мос келмаслигини маълум қилди.