"Бизни қўй деб атамасликлари учун митингга чиқамиз. Кеча ишғол қилиш уринишлари бўлди, ҳокимият бошқа томонга юз бурмоқда. Бу мажмуада фақат Атамбаев қуролланган эди. Бош прокурор тусмолланаяпти ёки қонунларни билмайди – менинг уйим суд қароригача давлат қўриқлови остида қолади ва бу ерга куч ишлатар тизимларнинг киришга ҳаққи йўқ", – деди Атамбаев.
Қирғизистон президенти Сооронбай Жээнбеков 8 август куни мамлакат Хавфсизлик Кенгаши мажлисида Атамбаев “қонуний тергов тадбирларини ўтказишга қаттиқ қуролли қаршилик кўрсатиб, Конституция ва мамлакат қонунларини қўпол бузган”лигини айтди. Жээнбеков мамлакатда қонунийлик ва хавфсизликни сақлаб қолиш учун “кечиктириб бўлмас чоралар” кўриш лозимлигини қўшимча қилди.
Атамбаевнинг қароргоҳи жойлашган Қўй-Тош қишлоғида ҳозирда 300 га яқин киши қолмоқда. Улар “Жээнбеков, кет” шиори остида Оқ уй ва ҳукумат биносига боришни рекжалаштирмоқдалар, деб хабар беради маҳаллий ОАВ.
8 августга ўтар кечаси Қирғизистон МХДҚнинг махсус кучлари мамлакатнинг собиқ президенти Алмазбек Атамбаевнинг Бишкек яқинигидаги Қўй-Тош қишлоғида жойлашган қароргоҳини ишғол қилди, бироқ муваффақиятсизликка учради.
Сўнгги тахминларга кўра, собиқ президент хоналардан бирига беркиниб олишга эришган, махсус кучларнинг уни қўлга олиш уриниши эса бесамар якунланган. Айни вақтда Атамбаев тарафдорлари қароргоҳ атрофида ўрнатилган тўсиқнинг бир қисмини йиқитиб, ичкарига ёриб киришган. Улар президентни ушлашга уринган бир неча жангчиларни қўлга олишган, улардан қуролларини олиб қўйиб, каттиқ калтаклашган.
Алмазбек Атамбаев мурожаат билан чиқди. Унинг баёноти видеоёзуви “Апрель” телеканали эфирида намойиш этилди. Хусусан, уни қўлга олиниш уринишлари ноқонуний бўлганини қайд этди. Атамбаев расмийларни бундай ҳаракатларни тўхтатишга чақирди, чунки, бу унинг фикрича, “яхшилик билан тугамайди”.
Можаро натижасида, сўнгги маълумотларга кўра, 52 киши жароҳатланди, махсус кучларнинг бир ходими олган жароҳатидан вафот этди. Касалхоналарда 31 киши қолмоқда, уларнинг 11 нафари куч ишлатар тизимларнинг тибиий муассасаларида ётқизилган. Чуй вилояти ИИББ бошлиғи Самат Курманкулов комага тушиб қолган, уни икки марта операция қилишган. Яна бир жабрланувчи жонлантириш бўлимида қолмоқда.
Собиқ президент Алмазбек Атамбаев махсус кучлар жангчиси ўлими учун жавобгарлик амалдаги давлат раҳбари Сооранбай Жээнбеков виждонига ҳавола, деб ҳисоблайди. Бу ҳақда у ўз тарафдорлари билан учрашувида баёнот берди.
Атамбаев уйида гаровда 6 нафар “махсус жангчи” қолмоқда. Атамбаев тарафдорлари уларнинг озод этилиши учун қишлоқда электр ва алоқа таъминоти тикланишини талаб қилмоқда. Ҳуқуқ тартибот органлари вакиллари собиқ президент сафдошлари билан ўтказилган музокаралардан сўнг қишлоқни тарк этишган.