Өзбекстан астанасындағы көп қабатты үйдің құрылысына колонияда жазасын өтеп жатқан 60 адам алынған. Сотталғандардың айтуынша, қаңтар айынан бастап жалақының бір бөлігі ұсталатын болған. "Олар біздің айлығымыздың 21 пайызын ұстап қалады. Бұрын мұндай жоқ еді. Бір де бір колонияда бұлай ашықтан-ашық тонаған емес", – деді сотталғандардың бірі.
"Айлық шамамен 1-2,5 миллион сум (110-280 доллар). Ай сайын әртүрлі айлық төлейді", – деді тағы бір жазасын өтеуші.
Олар колония саясатына ашық қарсы шығудан қорқады. "Біздің қолымыздан не келеді? Қарсы шыққандарға шара қолданады. Ертерек бостандыққа шыққысы келген адам қарсы шығудан қорқады".
№51 қоныс колониясының басшысы, подполковник Анвар Валиевтің мәлімдеуінше, жұмысшылар айлығының бір бөлігі түзеу мекемесін дамыту қорына аударылған және бұл - заңды.
"Біз айлықтың бір бөлігін бұрыннан қор есебіне аударып жүрміз. Бізде оны дәлелдейтін барлық құжат бар. Көрсете алам", – деді Анвар Валиев.
Өзбекстан Қылмыстық атқару кодексі бойынша, сотталғандардың еңбек құқығы еркіндіктегі азаматтардың құқықтарымен бірдей.