Ссылки доступа

Маҳкум қамоқдан қочди. Унинг мажбурий меҳнатдан безгани иддао қилинди


Тошкентдаги 51- манзил колонияда жазо ўтаëтган 43 яшар маҳкум Олимжон Абдуллаев бир ойча муқаддам қочиб кетгани маълум бўлди.

Жазони ижро қилиш бош бошқармасининг мулозимига кўра¸ шу ой бошида қочиб кетган маҳкум Олимжон Абдуллаев қидирувга берилган. Мулозимга кўра¸ қочган маҳкум Ўзбекистон Жиноят кодексининг 97- моддаси ("Қасддан одам ўлдириш") бўйича айбланиб, суд қарори билан 20 йилга озодликдан маҳрум қилинган.

- Маҳкум жазонинг 15 йилини ўтаб бўлгач, манзил колонияга ўтказилган ва яна 5 йил жазо ўташи лозим эди. Маҳкум изн бўлмагани ҳолда керакли одамлар билан жиноий тил бириктириб, паспорт олгани ортидан қочиб кетди¸ - деди исми айтилишини истамаган мулозим.

51-манзил колония маҳкумларидан бирининг айтишича, қочиб кетган маҳкум Олимжон Абдуллаев пайвандчилик қилиб, дарвоза ясаган ва мажбурий меҳнатдан безгани учун қочиб кетган:​

- Колониянинг "катталаридан" бири унга ҳар ой 100 доллар ўлпон солди. 100 доллар тўласанг, яхши юрасан, деб. Олимжон яхши уста. Темир дарвоза ясайди. Дарвозадан ясаб бериб турасан ҳар ҳафта, деб уни мажбурлади. Сварка қилавериб кўзи оғриб қолди. Кейин побегга кетворди. Менга Телеграмдан хат ëзиб, ўлпондан безганим боис қочдим, деб айтди. Мен ишондим унга. Чунки у 15 йил ўтириб берди. Колонкадан УДО (Муддатидан олдин шартли озод бўлиш -таҳр.) бўлиб чиқиб кетиши керак эди. Сабри тугади у бечоранинг.

51- манзил колония маҳкумларидан яна бирининг айтишича¸ колониядаги зулмга чидаш қийин. Маҳкумнинг айтишича¸ колониядаги маҳкумларнинг паспорти олиб қўйилади. Аммо қочиб кетган маҳкумда паспорт бўлган.

Жазони ижро қилиш бош бошқармасининг мулозимига кўра¸ маҳкум “шубҳали шахслар билан жиноий тил бириктириб” паспортини қўлига олган. "Унинг қочиб кетгани ҳақидаги хабар атайлаб кечиктириб хабар қилингани ҳақидаги маълумот текшириляпти. Ҳозир 51- манзил колонияда бу юзадан Жазони ижро қилиш бош бошқармаси хизмат текшируви олиб бормоқда", деди мулозим.

XS
SM
MD
LG