Ссылки доступа

Тожикистон пенсия идорасида 100 минг доллар ўғирлангани аниқланди


Пенсия муассасининг пойтахтдаги Фирдавсий туман бўлими ходимаси Зарина Бокиева 1 млн сомони (100 минг доллар)дан ортиқроқ бюджет маблағларини ўзлаштирганликда айбланмоқда.

Фирдавсий туман ижтимоий суғурта ва пенсия бошқармаси бошлиғининг ўринбосари Зарина Бокиеванинг қариндошларининг айтишича, у бюджетга етказилган зарарнинг ҳаммасини қайтарди. Аммо расмийлар Бокиевани ҳужжатларни сохталаштирганликда айбламоқда ва шу сабабли ҳам унга қарши жиноий иш очишди. Айбланувчининг ўзи тергов тугагунга қадар озодликда бўлади, аммо у билан учрашиб, маълумот олишнинг имкони бўлмади.

Тожикистон коррупцияга қарши кураш ва давлат молиявий назорат Агентлиги 20 август куни Душанбе шаҳридаги Фирдавсий туман ижтимоий суғурта ва пенсия бошқармаси бошлиғининг ўринбосари 49 нафар пенсионернинг 11 та банк картларидан фойдаланган ҳолда 1 млн 423 сомони бюджет маблағларини ўзлаштириб олганини маълум қилди. Хабарларга кўра, Зарина Бокиева бу пулларни 2016-2018 йилларда ва 2019 йилнинг биринчи тўрт ойида ўзлаштириб олган.

Пойтахтдаги пенсия агентлиги бошқармасининг хабар қилишича, йирик миқдордаги ўзлаштириш факти шу йилнинг июнь ойида аксилкоррупция агентлиги ходимлари томонидан фош қилинган.

Фирдавсий туман ижтимоий суғурта ва пенсия бошқармаси бошлиғи Азизжон Абдураҳмоновнинг 20 август куни Радио Озодига айтишича, мазкур жиноий иш доирасида ўзи ҳам сўроқ қилинган. Унинг сўзларига қараганда, Зарина Бокиева озодликда, шу билан бирга у бошқа тафсилотларни айтмади, фақат изоҳ учун коррупцияга қарши кураш Агентлигига мурожаат қилиш лозимлигини тавсия қилди.

Аксилкорупция агентлиги матбуот маркази ходими Беҳруз Назруллозоданинг маълум қилишича, тергов тугаши билан Бокиеванинг ҳаракатларига ҳуқуқий баҳо берилади. Шу билан бирга аксилкорупция идорасинг расмий веб-сайтида бу иш бўйича нафақат Зарина Бокиева, балки бир неча киши айбланаётгани маълум қилинган, аммо уларнинг исми-шарифи келтирилмаган.

Айни дамда Тожикистонда ўртача пенсия миқдори 305 сомонини ташкил қилади. Шу йилнинг 1 июль ҳолатига кўра мамлакатда 699 мингдан ортиқ пенсионер бор эди, сўнги йилларда уларнинг сони 3% га ошди.

XS
SM
MD
LG