Яқинда бу ерга ўғри тушди, аммо ҳуқуқ-тартибот идоралари ходимлари жиноятчиларнинг изига ҳамон тушгани йўқ. Цехда 20га яқин хотин-қиз тикувчилик сирларини ўрганар эди. Марказни пойтахтда истиқомат қилувчи, 51 ёшли, II-гуруҳ ногирони Бибикалон Хўжаева очган бўлиб, у ўзининг шу кунларга етиб кела олмаган 15 ёшли қизининг армонларини рўёбга чиқарган эди. Бибикалон маҳаллий расмийларга мурожаат қилди, улар маҳалла собиқ масжидини цех учун беришди. Бироқ ўғриликдан сўнг ҳеч ким Бибикалоннинг ёрдам сўраб қилган чақириқларига қулоқ солмаяпти.
Аввалига Бибикалон уйидан битта-ю битта машинкани олиб келиб цехни йўлга қўйди ва бироз пул сарфлади. Кейинроқ уни президент гранти бериш йўли билан Хотин-қизлар қўмитаси қўллаб-қувватлади – бу пулларга аёл 10дан ортиқ тикувчилик машинкаси ва керакли инвентарь сотиб олди. Бир йил давомида у имконияти чекланган хотин-қизлар мустақил пул топишлари учун уларни тикувчиликка бепул ўқитди.
Бир ярим ой муқаддам Бибикалон эрта тонгда ишга келади ва даҳшатли манзаранинг устидан чиқади: цехнинг эшик ва деразалари синдирилган, мулкнинг айрим қисми ўғирлаб кетилган эди.
«Ўғрилар ўзлари билан иккита кондиционер, 5 минг сомонига тенг матоларни, 1 минг сомони (110 долларга яқин) нақд пул ва бир нечта буюртма қилинган либосларни олиб кетишган. Улар тикув машинкаларини олиб кетиша олмаган ва шунинг учун ҳам синдириб кетишган. Цех остин-устин эди, деразалар синдирилганди. Биз ўша заҳотиёқ милицияга мурожаат қилдик, улар келишди ва кўришди», - дейди суҳбатдош.
Бироқ, ўшандан бери ҳуқуқ посбонлари жиноятчиларнинг изига туша олишмади. Цех фаолияти тўхтатилди.
Бибикалон Хўжаеванинг айтишича, собиқ масжид ўрнида цех очиш маҳаллий аҳолининг ҳаммасига ёқмаган.
«Ҳа, бу ерда аввал масжид бўлган эди, бироқ кейинчалик бино жамоат жойига айлантирилди. Кўпчилик норозилик билан бу жойни бекорга олганимизни, тайёрига келганимизни айтишарди. Айрим ота-оналар цехимизга келган қизларни уйдан ҳайдаб юборишлари борасидаги гап-сўзлар ҳам юрарди. Агар бизга бошқа ердан жой беришганидами, аллақачон бу ердан кетган бўлардик», - дейди аёл.
Маҳаллий аҳоли юз берган ҳодисадан афсусда эканликларини, цех ишига ҳеч қачон қарши чиқишмаганини айтишади.
Шохмансур туман раҳбарияти юз берган ҳодисадан хабардор этилди. Аҳолини ижтимоий муҳофаза қилиш туман бўлими бошлиғи Садбарг Саъдуллоева, аввал ўзи халқ ҳунармандчилик бўлимини бошқарганини ва Бибикалон Хўжаеванинг илтимосини қўллаб-қувватлаганини ва собиқ масжидни цех учун берганини таъкидлади.
Унинг айтишича, Шохмансур туман ҳудудида 12 та жамоатчилик жойи бор ва уларнинг ҳаммаси тикувчилик цехи ва новвойхонага айлантирилган.
Шу билан бирга Бибикалон Хўжаева бўш ўтиргани йўқ ва имконияти чекланган аёлларнинг ўзлари нон топишлари учун тикувчилик цехининг фаолиятини қайта тиклашга ҳаракат қилмоқда.