Ссылки доступа

Уй қамоғига қўйиб юборилган "Ата Мекен" етакчиси Текебаев депутатлик мандатини қайтариб олишни режаламаяпти


Омурбек Текебаев ҳозирча ўз олдига депутатлик мандатини қайтариб олишни қўймаган, аммо партия ишини ташлаб қўймоқчи эмас. Бу ҳақда унинг ўзи журналистларга «Ата Мекен» партияси идорасида айтди. Суд Текебаев ва унинг ҳаммаслаги Дуйшон Чотоновни уй қамоғига жўнатди.

Уй қамоғига юборилган «Ата Мекен» партияси етакчиси Омурбек Текебаев ва собиқ элчи Дуйшонкул Чотонов суд мажлисидан сўнг ўша заҳоти «Ата Мекен» партияси идорасига йўл олдилар, уларни бу ерда партиядошлари ва ҳамммаслаклари, жумладан собиқ президент Роза Отунбаева ва собиқ бош вазир Темир Сариев кутиб олди.

Омурбек Текебаевнинг айтишича, суд жараёнини кутади ва ўзининг айбсизлигини исботлайди. У шунингдек, “қасд олиш” ниятида эмаслигини ва хукмронлиги даврида ўзига нисбатан жиноий иш очган собиқ президент Алмазбек Атамбаев ҳозирги ҳукуматнинг сиёсий маҳбуси бўлиб қолишини истамаслигини айтди.

Журналистларнинг саволига жавоб берар экан, ҳозирча депутатлик мандатини қайтариш масаласи билан шуғулланмаслигини таъкидлаб ўтди.

«Ҳозирча менда мандатни қайтариш нияти йўқ, мен ҳуқуқий ва сиёсий жиҳатдан реабилитация бўлишни истайман. Оқлов ҳукмидан сўнг биз бу масалани муҳокама қиламиз, ҳозирча бу бизнинг кун тартибдаги асосий масала эмас. Аммо партиявий ишим давом этаверади. Ҳатто қамоқда бўлганимда ҳам партия ишлади, фракция ишлади, ҳеч ким кетиб қолмади. Суд қандай қарор қабул қилишдан қатьий назар, мен партиявий фаолиятимни давом эттиравераман, мен қамоқда бўлганимда минглаб одамлар турли жойларда турлича усуллар билан бизнинг принциплар учун курашди. Шу сабабли ҳам мен партиядан чиқиб одамларни ташлаб кетмоқчи эмасман, бу хоинлик бўлади, биз сиёсий фаолиятни давом эттирамиз», -деди Текебаев.

29 август куни Бишкекдаги Биринчи май туман суди «Ата Мекен» партияси етакчиси Омурбек Текебаев ва собиқ элчи Дуйшонкул Чотоновга нисбатан эҳтиёт чорасини ўзгартирди. Улар уй қамоғига юборилди.

21 август куни Олий суд янги очилган вазият бўйича Омурбек Текебаев ва Дуйшонкул Чотоновнинг ишини қайта кўриб чиқиш учун Бишекдаги Биринчи май туман судига юборган эди.

2017 йилда россиялик тадбиркор Леонид Маевскийнинг 1 млн доллар пора бергани борасидаги кўрсатмасига биноан Омурбек Текебаев ва собиқ элчи Дуйшенкул Чотонов 8 йил муддатга озодликдан маҳрум қилинган эди. Сиёсатчиларнинг ўзлари қўйилган айбни тан олишмайди ва собиқ президент Алмазбек Атамбаев томонидан сиёсий таъқибга учраганликларини айтишади.

XS
SM
MD
LG