Расмий маълумотда айтилишича, бемор боланинг отаси ўғлини жарроҳлик амалиётидан ўтказиш учун пул йиғиш мақсадида ижтимоий тармоқлар орқали август ойида одамларга мурожаат қилган. Натижада унинг банк ҳисобига 24 миллион 596 минг сўм эҳсон пуллари келиб тушган. Жиноятчилар отага телефон қилиб, унинг картасига пул ўтказмоқчи эканликларини ва шунинг учун карта кодини айтишни илтимос қилганлар.
Ота бу гапларга ишониб, карта рақамини айтган. Жиноятчилар эса бу карта рақамидан фойдаланиб, йиғилган пулларни ўз ҳисобларига ўтказиб олганлар.
Тошкент шаҳар Ички ишлар бош бошқармаси мазкур воқеа юзасидан товламачилик моддаси асосида жиноят иши қўзғатилганини ва жиноятчилар қўлга олинганини билдирди.
Мазкур жиноятда гумонланиб Фарғона вилоятида аввал товламачилик ва ўғрилик қилгани учун судланган 17 ёшли фуқаро ҳамда унинг 19 ёшли дўсти қўлга олинди.
«Тергов жараёнида 20 июль куни мазкур шахслар оғир касал қизалоқнинг отасига ҳам ҳудду шундай йўл билан телефон қилганлари аниқланди. Улар қизалоқнинг отасига моддий ёрдам беришни ваъда қилиб, унинг картаси кодини олганлар ва 18 миллион 122 минг 781 сўмни ўз ҳисобларига ўтказиб олганлар», дейилади расмий хабарда.