Ссылки доступа

Туркманистонда бензин тақчиллиги давом этмоқда


Туркманистоннинг вилоят ёқилғи шахобчаларида ҳамон бензин йўқ. Озодлик радиоси мухбирларининг хабарига кўра, автомобил ёқилғиси тақчиллиги шароитида йўлларда автомобиллар камайди.

"А-92 ва А-95 умуман йўқ, айрим шахобчаларда А-80 ни топиш мумкин. Дизел ёқилғиси ғойиб бўлди. Бу шу қадар сезилиб қолдики, йўллар том маънода бўшаб қолди", - деб хабар беради 4 сентябрь куни Озодликнинг Туркманистондаги мухбирларидан бири.

"Мари вилоятида бензин йўқлиги айниқса, сезилмоқда. A-80 дан бошқа ёқилғи йўқ. Бугун барча шахобчаларда 92-бензин йўқлиги ҳақида эълонлар осиғлиқ. Кўплаб ҳайдовчилар паст сифатли бензин қуйишдан хавфсираяпти, шу туфайли трассаларда машиналар камайиб кетган", - деб хабар беради Озодликнинг Маридаги мухбири.

Озодликнинг Туркманистондаги суҳбатдошларининг қайд этишича, паст сифатли бензин носозликларга олиб келади, ваҳоланки, кўпларда автомобилни таъмирлатиш учун маблағ йўқ. Шу муносабат билан, ёқилғи тақчиллиги шароитида шахсий автомобилдан фойдаланишдан тийилиб туришни афзал кўришади. Шу билан биргаликда кўплар учун автомобиль тирикчилик ўтказишнинг ягона манбаи ҳисобланади.

"Кўплар киракашлик ҳисобига кун кечиради. Уларга айниқса оғир. Кун ўтказиш учун энди кўплаб кишилар ўз мулкини сотади. Бундан ташқари, автоинспекция пора илинжида автомобил ҳолатига ёпишади ", - қайд этади Озодлик мухбири.

Энергия ресурсларига бой Туркманистонда ёқилғининг мавжуд тақчиллиги 2018 йилнинг февралидан бери давом этади, ана ўшанда ёқилғи қимматлаган эди. Нархлар оширилиши арафасида шахобчаларда тақчиллик ва катта навбат юзага келди, полиция навбатчилиги амалга оширилди.

20 август куни мамлакат ОАВ кунига 500 та автомобилга хизмат кўрсатадиган иккита замонавий шахобча қурилиши бошлангани ҳақида хабар берди. Улардан бири Туркманобод-Газожак трассида, иккинчиси Лебап вилоятининг Ж.Хекимов номидаги Дайхан бирлашмасида жойлашган. 31 август куни Туркманистонда ишлаб чиқарилган бензиннинг Швейцария ва Афғонистонлик тадбиркорлар сотиб олгани хабар қилинди. Ҳажми аниқ айтилмаган.
Туркманистонда давлат томонидан ўрнатилган бензиннинг расмий қиймати А-95 нинг 1 литри 1.5 манатни ва А-80 ники 1.2 манатни, дизел ёқилғиси эса 1.4 манатни ташкил этади. (Туркманистон Марказий банки расмий курси бўйича 1 доллар 3.5 манат туради).

XS
SM
MD
LG