Ссылки доступа

Дархости озодии раиси пешини "Казатомпром" дубора рад шуд


Додгоҳи вилояти Қазоқистони Шарқӣ дархости раиси пешини ширкати "Казатомпром" Мухтор Ҷакишевро дар бораи пеш аз муҳлат аз зиндон озод шудан рад кард. Ҷакишев аз соли 2009 ба ин тараф дар зиндон аст.

"Ҳукми додгоҳи шаҳри Семей вилояти Қазоқистони Шарқӣ аз 24 июли соли равон зидди Ҷакишев бетағйир боқӣ монда, ҳамчунин шикояти ӯ ва вакилони дифоаш қонеъ карда нашуд", - иқтибос овардаанд расонаҳо аз баромади додраси парванда.

Худи айбдоршуда дар мурофиа ҳузур надошт. Гуруҳи фаъолони қазоқе, ки аз утоқи дигар ба воситаи оинаи нилгун раванди мурофиаро тамошо мекарданд, норозигии худро ба ҳукми додгоҳ баён карда, бо талаби раҳоии Ҷакишев "Озодӣ!" ва "Мухторро мекушанд!" шиор мепартофтанд.

Дар ҷараёни бозбинии парвандаи Ҷакишев дар шаҳрҳои Нурсултон, Алмато ва Актау бо талаби раҳоии ӯву маҳбусони сиёсии дигари қазоқ ҳамоишҳои эътирозӣ баргузор шуданд.

Додгоҳи Қазоқистон пештар, 24 июли имсол ва моҳи ноябри соли 2018 низ дархости озодии п Ҷакишевро рад карда буд. Дар охири моҳи сентябри соли 2018 аз се ду ҳиссаи муҳлати зиндони Ҷакишев ба итмом расид ва вай ба ин далел дархости раҳоии пеш аз муҳлатро кард.

Додгоҳ дар соли 2009 ӯро бо айби фасодкорӣ 14 сол зиндонӣ кард. Созмонҳои ҳомии ҳуқуқ соли 2013 Ҷакишевро маҳбуси сиёсӣ эътироф карданд. Кумитаи ҳуқуқи башари СММ дар соли 2015 аз мақомоти Қазоқистон хоста буд, ки Ҷакишевро озод кунанд.

XS
SM
MD
LG