Бу ҳақда Cumhuriyet нашри маълум қилди. Тергов давомида прокуратура Нодиранинг дугонаси Лейла Ниязовани сўроқ қилди. Марҳум қиз ва унинг дугонасини прокуратура терговчилари фоҳишалик билан шуғулланганликда айблашди.
«Менинг Нодирани фаҳш ишларга ундаганим ёки бу ишни қилишига шароит яратиб берганим ҳақидаги даъволар тўғри эмас. Тирикчилигимни Лалели туманидан сотиб олган текстиль маҳсулотларини Ўзбекистонга жўнатиш орқали таъминлайман. Керак бўлса юборилган чекларни ҳам тақдим қилишим мумкин. Нодира уйимда ҳеч қачон тунамаган», — деди Лейла Ниязова.
Нодира Қодирова пул топиш мақсадида тўрт йил муқаддам Туркияга келган. Сўнгги йилларда у Ширин Уналнинг уйида ишлаган. Қиз генералнинг кекса онасига қараб турган. Ўзбекистонлик қизнинг жасади Ширин Уналнинг Анқарадаги уйидан топилди, унинг ёнида генералга тегишли тўппонча бор эди. Бу вақтда Унал ва оила аъзолари уйда бўлган.
Нодира Қодированинг жасади 25 сентябрь куни ватанга олиб келинди. Нодиранинг акаси Муҳаммадали Қодировнинг журналистларга айтишича, синглиси олий ўқув юртига кириш учун имтиҳонларга тайёргарлик кўраётган эди. Йигитнинг айтишича, ўз жонига қасд қилиш учун Нодирада асос бўлмаган.
Ўтган ҳафтада Ўзбекистоннинг Анқарадаги Бош консулхонаси вакили Нодиранинг акаси Туркияга қайтиб келганидан сўнг Ўзбекистон дипломатик ваколатхонаси унга кучли адвокат топишга ёрдам беришини айтган эди. Адвокат Нодиранинг акасининг барча шубҳа ва тахминларини терговга тақдим қилади.