Коммунистик партия Хитойда ҳокимият теппасида қолмоқда, шу билан бирга 1970-йиллар сўнггида бошланган иқтисодий ислоҳотлар Хитойни глобал иқтисодиёт сафига қўшди ва мамлакатда одамларнинг турмуш даражаси юксалди. Ҳуқуқ ҳимоячилари ва Ғарб мамлакатлари ҳамон Хитойни, жумладан Тибет ва Шинжон Уйғур мухтор ўлкасида инсон ҳуқуқларини бузаётганликда, ахборот чеклови, шунингдек сиёсий рақобат йўқликда айблайди.
Сана муносабати билан Пекинда ҳарбий парад бўлиб ўтди. Унда мамлакатнинг ҳозирги раҳбари Си Цзиньпин ва унинг икки ўтмишдоши Ху Цзиньтао ва Цзян Цзэминь иштирок этди. Ўз нутқида Хитой раҳбари “Бирорта ҳам куч Хитойни мавқени ўзгартишга ва унинг олға ташланган қадамларини тўхтатишга қодир эмас” дея баёнот берди. Шу билан бирга у “ҳамжиҳатлик асосида” мамлакат жаҳонга очиқлик сиёсатини давом эттираверишини таъкидлади.
Парадда қатнашган ҳарбий техникалар орасида ядро қалпоқчаларини элтувчи ва АҚШга уча олиш қобилияти бўлган қитъалараро DF-41 баллистик ракеталари ҳам бор эди. Шунингдек янги қанотли ракеталар намойиш этилди.
Парадда 15 минга яқин харбий хизматчи иштирок этди.
20 йил муқаддам Хитой юрисдикциясига ўтган ва бир неча ойдан бери норозилик намойишлари давом этаётган Гонконгда сешанба куни яна намойишчиларнинг полиция билан тўқнашуви бўлиб ўтди. Намойишчилар баррикадалар қурмоқда, полиция кўздан ёш оқизувчи газ қўлламоқда.