Самарқандық Гүлшан Шарифова дем алуы қиындағанына байланысты мұрнының ішіндегі етті алдыру үшін Mont Blanc клиникасына барған. Операцияға 8 миллион сум (850 доллар) төлеген.
Марқұмның әкесі қызының аллергиясы бар екенін ескертіп, дәрігерлерден мұқият болуын сұраған. Бірақ операция кезінде келіншек комаға түсіп, үш күннен кейін көз жұмған.
Гүлшан Шарифованың әкесі Умид Абдушукуровтың айтуынша, осыған дейін аталған клиникада 42 жастағы әйел мерт болған:
– Прокуратура қызметкерлері келіп, қылмыстық іс қозғайтынын айтып кетті. Бірақ маған қыздың денесіне сараптама жасалынатынын, сүйегі осында қалуы тиіс екенін ескертті. Осыдан кейін мен қызымның сүйегін Самарқандқа алып кетем деп шештім.
Марқұмның туыстары дәрігерлерге еш кінә артпаймыз деген құжаттарға қол қойғаннан кейін, прокуратура істі тоқтатқан.
Клиника дәрігері Фахриддин Облокулов Гүлшан дәріден аллергия болып, анафилактикалық шоктан мерт болды дейді.
Клиника операцияға төленген ақшаны қайтарып берген. Бірақ марқұмның жақындары моральдық өтемақы әлі алмаған. Дәрігерлер жұмыстан шығарылған, бірақ жауапкершілікке тартылмаған.
Клиника таяуда атауын "Мукаммаллик" деп өзгертіп, қайта істеп жатыр.
20 жастағы Гүлшан Шарифова Ташкент қаржы институтының 3-курсында оқыған, артында бір ұлы қалды.